Kegeylilik ishbilarmon ayollar aniqlandi
20.07.2023, 09:56
Har yili an’anaviy tarzda o‘tkazib kelinayotgan “Ishbilarmon ayol” ko‘rik-tanlovining tuman bosqichlari hududlarda davom etmoqda.
O‘zLiDeP Kegeyli tuman kengashi tomonidan “Ishbilarmon ayol – 2023” ko‘rik-tanlovining tuman bosqichida shu yerda faoliyat yuritayotgan 20 ga yaqin tadbirkor, fermer va hunarmand xotin-qiz o‘zlari tayyorlagan mahsulotlar bilan ishtirok etdi.
Tanlovni o‘tkazishdan maqsad esa mamlakatimizda amalga oshirilayotgan ijtimoiy-iqtisodiy islohotlar, siyosiy jarayonlar tub mazmun-mohiyatini keng targ‘ibot-tashviqot qilish, yurtimiz iqtisodiyoti, kichik biznes va xususiy sektorning rivojlanishida faol ishtirok etayotgan shijoatli, tashabbuskor xotin-qizlarni har tomonlama qo‘llab-quvvatlash, ularning Vatanimiz kelajagi yo‘lidagi intilishi, izlanishlaridagi faol ishtirokini rag‘batlantirish tufayli bugunning zamonaviy tadbirkor ayol qiyofasini yaratishdan iboratdir.
Hakamlar hay’ati a’zolari tanlov doirasida 20 ga yaqin tadbirkor, fermer va hunarmand xotin-qizlar faoliyati bilan yaqindan tanishib, ularning shu davrga qadar erishgan yutuqlari, imkoniyatlari va kelgusi rejalari bilan o‘rtoqlashdi.
– Ish boshlaganimizga hali ko‘p vaqt bo‘lgani yo‘q, – deydi “Sarbinaz milliy kiyimlari” MChJ rahbari Sarbinaz Ataniyazova. – Asosan qoraqalpoq xalqining milliy kiyimlari bo‘lgan ko‘k ko‘ylak, sao‘kele, quroq ko‘rpachalar, do‘ppi va liboslar buyurtma asosida tayyorlanadi. Korxonamizda hozir 5 nafar qiz doimiy ish bilan ta’minlangan. “Xalq bank”idan 33 million so‘m miqdorida imtiyozli kredit olib, qo‘shimcha tikuv mashinalari xarid qildik. Mahsulotlarimiz ichki bozorda o‘z xaridoriga ega. Kelgusida faoliyatimizni yanada kengaytirib, yangi ish o‘rinlari yaratish niyatidamiz.
Tanlov yakunida hakamlar hay’ati a’zolari tomonidan 3-o‘rin – yakka tartibdagi tadbirkor Dilbar Seytniyazovaga, 2-o‘rin – “Allayar Muxamedyar” MChJ rahbari Gulchehra Jumanazarovaga, faxrli 1 o‘rin – “Sarbinaz milliy kiyimlari” MChJ rahbari Sarbinaz Ataniyazovaga berildi.
G’olib bo‘lgan ishtirokchilar tanlovning Qoraqalpog‘iston Respublikasi bosqichiga qatnashish huquqiga ega bo‘ldi. Bundan tashqari beshta nominatsiya bo‘yicha ham xotin-qizlar rag‘batlantirildi. Joylarda tanlovning tuman bosqichlari davom etmoqda.
Jamila YEGAMBERGENOVA,
O‘zLiDeP Qoraqalpog‘iston Respublikasi kengashi
“Ayollar qanoti” bo‘lim mudiri
O'xshash yangiliklar
-
Poytaxtlik ishbilarmon xotin-qizlar mahallalar kesimida saralanyapti
25.04.2024, 12:01
-
Ishbilarmon ayollar saralanmoqda
21.04.2024, 13:39
-
O‘zLiDeP “Ayollar qanoti” loyihalari orqali ishsiz xotin-qizlar tadbirkor bo‘lyapti
09.04.2024, 19:52
-
Qoratepalik Matluba opa tomorqasidan har yili 30 million so‘m daromad qilmoqda
09.04.2024, 19:49
-
Xotin-qizlarning iqtisodiy, ijtimoiy va siyosiy faolligini oshirishga eʼtibor yana-da kuchaygan
31.03.2024, 10:51
Fikringizni qoldiring