O‘zLiDeP Samarqand shahar Kengashi “O‘zbekiston” MFYda joylashgan 20-umumta’lim maktabida sayyor qabul tashkil etdi. Qabul davomida hududda istiqomat qiluvchi fuqarolar tomonidan 30ga yaqin murojaatlar kelib tushdi.

Masalan, mahalla ahli nomidan so‘z olgan Samariddin Aliqulov ichki yo‘llarni ta’mirlash va hududni obodonlashtirishda mutasaddilardan ko‘mak so‘radi.

–Respublikamizning barcha hududlarida bo‘lganman. To‘g‘risi, boshqa hududlarda “O‘zbekiston” nomi bilan ataladigan ko‘chalarni ko‘rsangiz ko‘zingiz quvnaydi. Ammo bizning ko‘chada yursangiz ta’bingiz xira bo‘ladi, – deydi S.Aliqulov. – Shu bois, mazkur masalada hududimizda tashkil etilgan sayyor qabulda tashkilotchilardan amaliy yordam so‘rab murojaat qildik. Murojaatimizni o‘zimiz saylagan deputatimiz Fazliddin G‘aybullayev o‘z zimmasiga olib, yaqin kunlarda hal etib berishga va’da berdi.

Shu mahallada yashovchi Qahramon Boboqulov esa yo‘llarda mashinalarning noo‘rin signal chalishini ta’qiqlash bo‘yicha Oliy Majlis qonunchilik palatasiga taklif kiritishda ko‘mak so‘radi.

–Shahrimizdagi ayrim avtobus va avtomobillar qonunchiligimizga to‘g‘ri kelmaydigan signallarni o‘rnatib olgan. Buning natijasida ko‘chada shovqindan yurib bo‘lmaydi. Ularni kim nazorat qiladi, biz kimga murojaat qilishimiz kerak, – dedi mahalla faxriysi.

 Uning murojaatini ham xalq noibi, O‘zLiDeP deputatlik guruhi rahbari F.G‘aybullayev nazoratga olib, viloyat IIB Yo‘l harakati xavfsizligi boshqarmasiga deputatlik so‘rovi yuborish orqali muammoni hal etib berishini ma’lum qildi.

Shuningdek, qabul davomida fuqarolar tomonidan avtobuslar sonini ko‘paytirish, kommunal va obodonlashtirish sohalariga oid qator murojaatlar ham o‘rtaga tashlandi.  

Baxtigul QARShIYEVA,

 O‘zLiDeP Samarqand viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!