O‘zLiDeP Siyosiy Kengashi Ijroiya qo‘mitasi, Buxoro viloyat, tuman, shahar Kengashlari mas’ul xodimlari Buxoro tumanidagi “Bog‘ikalon” MFY aholisi bilan yuzma-yuz muloqotda bo‘ldi.

Uchrashuvlar davomida aholi turmush tarzini yaxshilashga to‘sqinlik qilayotgan, anchadan beri ularni qiynab kelayotgan muammolar borligi aniqlandi. Muloqotlar chog‘ida “Bog‘ikalon” MFY da istiqomat qilayotgan Murtazo Bekmurodov ushbu maskanga ichimlik suvi uzoqdan yetkazib berilayotganligini kuyunchaklik bilan tilga olib o‘tgan bo‘lsa, boshqa bir fuqaro Karim Ibodov  nabirasini maktabgacha ta’lim muassasasiga joylashtirishda qiynalayotganligini aytib o‘tdi.

- Obodonlashtirish ishlarining cho‘zilib ketganligi atrof-muhit musaffoligini ta’minlash imkonini bermayapti, - deydi Abera Idiyeva partiya faollari bilan bo‘lib o‘tgan suhbatda. - Hammayoq chang-to‘zonga to‘lib ketgan. Qishloq ko‘chalaridan yayov yurishning iloji yo‘q. Qishloq yo‘llarining ta’mirtalab bo‘lib qolganligi ham aholining haqli e’tirozlariga sabab bo‘layapti. Tomorqalarni sug‘orish uchun berilayotgan suv miqdorini ham yetarli deb bo‘lmaydi. Xonadonlarni ichimlik suvi bilan ta’minlash muammosini ham hal qilish vaqti allaqachon yetib kelgan.

Mavjud muammolarni mahalliy Kengash deputatlari, partiya faollari hamda ijro hokimiyati organlari yordamida ijobiy hal etishga kelishib  olindi.

 O‘zLiDeP Buxoro viloyat Kengashi

matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!