Savolga Prezidentning virtual qabulxonasida quyidagicha javob beriladi:

Yosh oila toifasiga – er-xotinning ikkisi ham o‘ttiz yoshdan oshmagan oila yoxud farzand (bola) tarbiyalab voyaga yetkazayotgan o‘ttiz yoshdan oshmagan yolg‘iz otadan yoki yolg‘iz onadan iborat bo‘lgan oila, shu jumladan, nikohdan ajralgan, beva erkak (beva ayol) kiradi.

Mustaqil hayotni boshlashga ko‘maklashish uchun yosh oilalarga imtiyozli asosda ipoteka, iste’mol va mikrokreditlar ajratiladi:

Tadbirkorlik faoliyatini amalga oshirish uchun eng kam oylik ish haqining 1000 baravaridan oshmaydigan miqdorda mikrokredit;

Sotib olinayotgan ko‘chmas mulkni garovga olish orqali uy-joy qurish, rekonstruksiya qilish va sotib olish uchun ipoteka krediti. Yosh oilalarga beriladigan ipoteka kreditlari 15 yildan kam bo‘lmagan muddatga, uch yillik imtiyozli davr bilan ajratiladi;

Iste’mol ehtiyojlarini qondirish maqsadida tovarlar (ishlar, xizmatlar) sotib olish uchun jismoniy shaxsga iste’mol krediti ajratilishi mumkin.

Yosh oilalarga ipoteka, iste’mol va mikrokreditlar O‘zbekiston Respublikasi Markaziy bankining qayta moliyalash stavkasidan yuqori bo‘lmagan foiz stavkasida ajratilishi belgilangan.

Tijorat banklari tomonidan yosh oilalarga beriladigan ipoteka krediti kredit resurslari manbasidan qat’iy nazar, quyidagi miqdorlarda beriladi:

yakka tartibdagi uy-joyni qurish va sotib olish uchun - eng kam oylik ish xaqining 3000 baravarigacha;

Yakka tartibdagi uy-joyni rekonstruksiya qilish, shuningdek ko‘p kvartirali uydagi kvartirani sotib olish uchun - eng kam oylik ish xaqining 2500 baravarigacha ajratiladi.