Bugun matbuotda Prezidentimizning “Fermer, dehqon xo‘jaliklari va tomorqa yer egalari faoliyatini takomillashtirish bo‘yicha qo‘shimcha chora-tadbirlar to‘g‘risida”gi qarorini o‘qib, beixtiyor shu so‘zlarni aytib yubordim.

 Boisi, qarorda 2018 yilning 1 iyulidan e’tiboran dehqon xo‘jaligi va 4 sotixdan kam bo‘lmagan tomorqa yerida band bo‘lgan yoki ushbu uchastkada qoramol yoxud 50 boshdan kam bo‘lmagan parranda parvarishlayotgan jismoniy shaxslar tomonidan O‘zbekiston Respublikasi Moliya vazirligi huzuridagi Budjetdan tashqari pensiya jamg‘armasiga yiliga eng kam oylik ish haqining bir barobari miqdorida sug‘urta badali to‘langan yil mehnat stajiga kiritilishi belgilandi. Aytish kerakki mazkur norma pensiya g‘amini yeb yurgan uy bekalari va o‘z tomorqasida mehnat qilayotgan yurtdoshlarimiz uchun Prezidentimiz tomonidan ajoyib tuhfa bo‘ldi,  desak sira yanglishmaymiz. Haqiqatan ham bunaqa imkoniyat va imtiyozlar jahonning boshqa mamlakatlarida ham kamdan-kam kuzatiladi, desak adashmaymiz.

Bilamiz-ki O‘zLiDeP tomonidan hududlarda  “Tomorqa — qo‘shimcha daromad manbai” shiori ostida tashviqot-targ‘ibot ishlari hamda “O‘zLiDeP boshlang‘ich tashkilotlari o‘z tomorqasida faoliyat boshlaganlarga ko‘makdosh”  loyihasi orqali aholi orasiga yanada chuqurroq kirishga intilayapti. Maqsad tomorqa xo‘jaliklariga o‘zini to‘la tiklab olishiga, xonadonlarning moddiy farovonligini, shuningdek, ma’naviy va huquqiy savodxonligini oshirishga yordamlashishdan iboratdir. Loyiha doirasida aholi bilan uchrashganda mazkur qarorning shu jihatini ularga alohida tushuntirishimiz zarur. Zero, bu sa’y-harakatimiz odamlarning tomorqadan unumli fodalanishga bo‘lgan ishtiyoqini yanada ortishiga xizmat qiladi, albatta.

Rustam HAKIMOV,

O‘zLiDeP Namangan viloyat Kengashi

Mafkuraviy targ‘ibot-tashviqot

ishlari bo‘limi mudiri

***

Korxonamiz meva-sabzavot, poliz mahsulotlari va rezavorlar yetishtirish, ularni saqlash hamda chuqur qayta ishlash, buyurtmachilarga kafolatli ravishda yetkazib berish bilan shug‘ullanadi.

Ko‘rinib turganidek, faoliyatimiz bevosita qishloq xo‘jaligi sohasi bilan chambarchas bog‘liq. Arzon, sifatli, sara meva-savzavotlarga doimiy ehtiyojimiz bor. Shu ma’noda Prezidentimizning “Fermer, dehqon xo‘jaliklari va tomorqa yer egalari faoliyatini takomillashtirish bo‘yicha qo‘shimcha chora-tadbirlar to‘g‘risida”gi qarori faoliyatimizni yanada kengaytirishga qaratilgan muhim qaror bo‘lganligini alohida ta’kidlamoqchiman.

Qarorga binoan ishlab chiqarilgan mahsulotlar va qishloq xo‘jaligi ekinlarini ichki va tashqi bozorlarda sotish, shu jumladan, ularni tayyorlash, saqlash, qayta ishlash va eksport qilish bo‘yicha aniq vazifalar belgilab berildi. Bu esa men kabi tadbirkorlarning nafaqat ichki, balki tashqi bozordagi faoliyatini yanada kengaytirish uchun juda yaxshi imkoniyatdir.

Italiyalik o‘simlikshunos olimlar bilan iqlim sharoitimizga mos  gilos va boshqa danakli mevalar (o‘rik, shaftoli va olxo‘ri) navlarini yaratish bo‘yicha hamkorlikni yo‘lga qo‘yganmiz, Ular bilan birgalikda o‘zimizda yetishtiriladigan gilosning hajmini biroz kattalashtirish va eng asosiysi uning ma’lum muddatga saqlash uchun zichligini oshirishga ham muvaffaq bo‘ldik. Shu asosda Namangan viloyatining To‘raqo‘rg‘on tumanida 500 gektar yerga ana shunday hosil beruvchi gilos ko‘chatlarini ekdik. Negaki, eksportning o‘ziga xos tartiblari bor. Mahsulot vaqtida yig‘ib olinishi, yaxshi saqlanishi, qadoqlanishi va xaridorga sifatli yetkazilishi kerak. Ochig‘ini aytish kerak, mamlakatimizda yetishtirilayotgan aksariyat meva-sabzavotlar xorijlik hamkorlarga yetib borguncha biroz sifati buzilayapti.

Endilikda biz mazkur faoliyatimizni kengaytirish bo‘yicha “Tomorqa xizmati” MChJga bemalol murojaat qilishimiz, zarur maslahat va ko‘rsatmalar olishimiz mumkin. Bu ham ayni shu yo‘nalishda faoliyat yuritayotgan tadbirkorlar uchun juda katta imkoniyatdir.

Murodjon VALIYEV,

“Gold Dried Fruits” mas’uliyati

cheklangan jamiyati rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!