O`zLiDeP Тошкент шаҳар ва Мирзо Улуғбек туман Кенгашлари томонидан Москва давлат халқаро муносабатлар институти Тошкент филлиали билан ҳамкорликда “Янги авлод кадрлари” лойиҳаси доирасида давра суҳбати ташкил этилди.

Тадбирда Олий Мажлис Қонунчилик палатаси депутати Дилором Файзиева, партиянинг Тошкент шаҳар Кенгаши фаоллари, Халқ депутатлари Тошкент шаҳар ва туман Кенгашларидаги O‘zLiDeP депутатлик гуруҳи аъзолари, университет профессор-ўқитувчилар, талаба-ёшлар иштирок этди.

- Мазкур лойиҳадан кўзланган мақсад партия иш фаолиятида кадрлар захирасини шакллантириш ва уларнинг малакасини ошириш, партиянинг ривожи учун муносиб фаолларни танлаб олишдир. Шу боис, лойиҳа доирасида кадрларнинг билими, савияси, тажрибаси, жамоатчилик ўртасидаги обрўси хусусида кенг ва батафсил ўрганишга ҳаракат қилдик, чунки партиялар сафини билимли, ташкилотчи ва ватанпарвар ёш кадрлар билан тўлдириш устувор вазифамиз, – дейди O‘zLiDeP Тошкент шаҳар Кенгаши ёшлар билан ишлаш бўлими мудири Моҳинисо Фармонова.

Дарҳақиқат, глобаллашув шароитида ва сиёсий партиялар ўртасида рақобат кучайиб бораётган бир даврда партиянинг марказий, ҳудудий ва туман (шаҳар) Кенгашларига ишга қабул қилиш учун сиёсий жиҳатдан етук, кадрларни танлаш ҳамда уларни жой-жойига қўйиш ишларини янада такомиллаштириш, замонавий фикрлайдиган ёш кадрларни партиянинг амалдаги ва истиқболли кадрлар захирасига тавсия этиш муҳим аҳамият касб этиши таъкидланди.

Тадбир давомида сиёсий жараёнларга қизиқиши баланд бўлган 10 нафардан ортиқ ёшлар истиқболли кадрлар захирасига олинди.