Марҳамат туманининг 2021 йил учун бюджет даромадларининг контингент бўйича режаси 96 миллиард 592 миллион сўм бўлиб, шундан маҳаллий бюджет даромадлар режаси 36 миллиард 588 миллион сўм миқдорида белгиланган. Аммо туман маҳаллий бюджет даромадлари режаси 1 чорак бўйича орттирилиб бажарилганига қарамай, ер қаъридан фойдаланилганлик учун солиқ (норуда материаллари) бўйича чораклик режа бор-йўғи 78,5 миллион сўмга бажарилган. Бу дегани аслида белгиланган режа 209,4 миллион бўлса-да, белгиланганидан 130,9 миллион сўмга кам бажарилган, деган кўрсаткичдир.

O’zLiDeP Марҳамат туман Кенгашидаги депутатлик гуруҳининг навбатдаги йиғилишида туман молия бўлими мутасаддисининг шу каби масалалардаги ҳисоботи тингланди. Унда депутатлар туманнинг ижтимоий-иқтисодий ривожлантириш дастурини амалга ошириш бюджетининг даромадлари базасини ошириш ва янги иш ўринлари барпо этиш бўйича 2021 йил 1 чорак давомида ишлаб чиқилган чора-тадбирлар режаси ҳамда амалга оширилган ишлар юзасидан ўзларини қизиқтирган саволларга батафсил жавоблар олдилар.

-Туман маҳаллий бюджетининг даромадлари базасини яратиш бўйича Ўзбекистон Республикаси Вазирлар Маҳкамасининг 445-сонли қарори асосида туман молия бўлими томонидан ўтган 4 ой давомида жами 106.4 миллион сўмлик йиллик ундирилиши мумкин бўлган қўшимча даромадлар аниқланди, - дейди халқ депутатлари туман кенгаши депутати Бахтиёржон Абдуллажонов. – Ҳисоботда ва ўрганишларимиз натижасида маълум бўлдики, ўтган йилдагиларга нисбатан фарқли равишда туман ҳокимлигининг кўмаги билан даромадлар режа кўрсаткичи чорак бўйича ортиғи билан бажарилишга эришилди. Бироқ мавжуд камчиликлар ҳам йўқ эмас. Уларни мутасаддилар билан биргаликда ҳал этиш чораларини кўряпмиз.

Айтиш жоизки, ҳисоботда қайд этилишича, туманда 2021 йилда жами янги иш ўринларини ташкил этиш йиллик режаси 2119 та бўлиб, амалда 439 та иш ўринлари яратилган, бу эса йиллик режага нисбатан 20,7 фоизлик кўрсаткич.

Йиғилишда “Аёллар” ва “Ёшлар” дафтарлари бўйича ҳам қизғин мунозаралар бўлиб ўтди. Жумладан, “Ёшлар” дафтарига киритилган тумандаги 2715 нафар йигит-қизлардан 1430 нафарига бандлик муаммосини бартараф этиш бўйича амалий кўмак кераклиги аниқланган. Айни кунга қадар уларнинг 1373 нафарининг бандлиги таъминланган. Аниқроғи, улардан 353 нафари эса доимий ишга жойлаштирилган, 668 нафарига томорқачилик билан шуғулланишлари учун 10 сотихдан ер майдони ажратилган. 287 нафарининг эса ўзини ўзи банд қилиш орқали, 33 нафарининг имтиёзли кредит орқали, 32 нафарининг эса жамоатчилик йўналиши орқали бандлиги таъминланган.

Қизғин баҳс-муҳокамаларга бой ўтган йиғилишда депутатлар мутасаддининг ҳисоботидан қониқиш ҳосил қилдилар.

Муҳаррам ГУЛМАТОВА,

 O’zLiDeP Марҳамат туман Кенгаши

 ижрочи котиби