Халқ депутатлари Асака туман кенгаши депутатлигига “24-Мустакиллик” сайлов округидан сайланган Сайдилло Эргашев фаолиятидан бугун аҳоли мамнун. Вақт топди дегунча сайловчиларига елкадошликка ошиқадиган депутат тиниб-тинчимайди.

Халқ ноибининг сайловчилари хонадонларига навбатдаги йўқловлари Қурбон ҳайити муносабати билан ташкил этилди. Оилаларнинг байрамга шарт-шароитларини ўрганиб, уларга кўмак беришга бел боғлаган С.Эргашев қатор муаммоларни ҳам бартараф этгани қувончли.

Кобилжон Холмирзаев “Ибн Сино” маҳалла фуқаролар йиғинида истиқомат қилади.  Ёши элликка яқинлашиб қолган фуқаро жигар церрози хасталигидан азият чекади. Мунтазам парвариш ва вақти-вақти билан шифокор кўриги зарур. Бироқ бунга имконияти ҳам, даромади ҳам етарли эмас.

Депутат оиланинг яшаш шароитларини ўрганар экан, шу куннинг ўзида хонадонда туман тиббиёт бирлашмаси орқали чуқурлаштирилган тиббий кўрик ташкил қилишга эришди. Бириктирилган оила шифокори, патронаж, маҳалла мутасаддилари ҳам халқ ноиби билан ҳамкорликда фуқаронинг саломатлигини қатъий назоратга олди.

Касалликнинг амалиёт жарроҳлигини ўтказишда амалий кўмак учун туман ҳокими номига депутатлик сўрови юборилди.

Муқаддамхон АБДУЛЛАЕВА,

O’zLiDeP Асака туман Кенгаши ижрочи котиби.