Samarqand viloyatining Pastdarg‘om tumani azaldan ishbilarmon va tadbirkorlari bilan nom qozongan. Ayni chog‘da hududda birovdan yordam kutmay, ro‘zg‘orining kam-ko‘stini to‘ldirayotgan ishbilarmonlar ko‘pchilikni tashkil etadi.

Pastdarg‘omlik Mayram Sanaqulov ham 6 sotixlik tomorqasidan samarali foydalanib kelayotgan omilkorlardan biri. Hozir o‘z hovlisida kartoshka, pomidor, bodring, sarimsoqpiyoz yetishtiryotgan tadbirkor birinchi ekin hosilidan 5 yarim million so‘m daromad olishni rejalashtiryapti.

Eng chekka hududlarga kirib borayotgan “O‘zLiDeP boshlang‘ich partiya tashkilotlari o‘z tomorqasida faoliyatini boshlaganlarga ko‘makdosh” loyihasi ko‘plab xonadon egalariga yaqindan ko‘mak bermoqda. Mazkur loyiha doirasida O‘zLiDeP Pastdarg‘om tuman kengashi faollari hamda tuman Pochta shu’basi qoshidagi BPT a’zolari Sanaqulovning xonadonida bo‘lib, unga tomorqadan unumli foydalanish uchun “O‘rikzor” MFYda yashovchi Alisher Jiyanovning tajribasini misol qilib ko‘rsatdi.

Partiya faollari ko‘magida 4 sotixlik yer maydonida issiqxona tashkil etgan tadbirkor allaqachon yerga urug‘ ekishga ham ulgurdi.

 “Istiqlol” – Narpay tumanidagi obod mahallalardan biri. Keyingi paytlarda hududda o‘z hovlisida issiqxona tashkil etib, oilasi farovonligiga munosib hissa qo‘shayotgan omilkorlar soni tobora ortib bormoqda. Ular, asosan, pomidor, bodring, sabzavot va ko‘kat yetishtiradi.

–Vodiylik mirishkor dehqonlarning yutuqlarini ko‘rib, tadbirkorlik faoliyati bilan shug‘ullanish niyatida yurgan edim, – deydi shu hududda yashovchi Shokir Yusupov.– Yaqinda partiya faollari xonadonimizga kelib 2,4 sotixlik yer maydonida issiqxona tashkil etishga ko‘maklashdi. Endi kundalik ehtiyoj uchun zarur pomidor, bodring yoki boshqa rezavorlarni o‘z tomorqamizda yetishtiramiz. Bu ortiqcha harajatlarning oldini olib, oila budjetini tejash imkonini beradi.

Uchrashuvlar davomida shuningdek, yaqinda tadbirkorlik faoliyatini boshlagan tadbirkorlarga limon yetishtiruvchi mutaxassislar tomonidan zarur ko‘rsatmalar berildi.

Baxtigul QARShIYEVA,

O‘zLiDeP Samarqand viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!