Avval xabar qilganimizdek, Tadbirkorlar va ishbilarmonlar harakati – O‘zbekiston Liberal-demokratik partiyasi hamda O‘zbekiston Respublikasi Oliy va o‘rta maxsus ta’lim vazirligining Kasb-hunar ta’limi markazi bilan hamkorlikda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” Davlat dasturi ijrosini ta’minlash, yosh avlodning innovatsion g‘oya va tashabbuslarini har tomonlama rag‘batlantirish maqsadida mamlakatimizdagi kasb-hunar kollej o‘quvchilari o‘rtasida o‘tkazilayotgan “Yosh innovatsiyachi” ko‘rik-tanlovining tuman (shahar) bosqichlari o‘z yakuniga yetib, viloyat bosqichlari boshlandi.

Mazkur ko‘rik-tanlovning Samarqand viloyat bosqichida tuman (shahar)dan g‘oliblikni qo‘lga kiritgan 48 nafar ishtirokchilar innovatsion g‘oyalari bilan ishtirok etishdi.

Ta’kidlash joizki, mamlakatimizda  har yili yoshlar o‘rtasida qator tanlovlar  o‘tkazib kelinadi. Ammo qiziquvchan, intiluvchan, ixtirochi-ijodkor yoshlarni qo‘llab-quvvatlovchi tanlovlar deyarli yo‘q edi. Shu sababli, ushbu tanlov yoshlar orasida tezda ommalashdi va unga qiziqish bildirganlar soni talaygina. Tanlovning tuman (shahar) bosqichlarida 189 nafar yoshlarning ishtirok etganligi fikrimizning dalildir.

Bugungi kunda mamlakatimizda tomorqa xo‘jaligini rivojlantirishga katta e’tibor qaratilmoqda. Shuni inobatga olib, Bulung‘ur maishiy xizmat ko‘rsatish kolleji talabasi Nurmuhammad Fayzullayev texnika kira olmaydigan tomorqalar uchun loviya va makkajo‘hori ekishga mo‘ljallangan “Urug‘ ekish qurilmasi”ni yaratdi. Uning ushbu ixtirosi tanlov ishtirokchilarining e’tiborini jalb qila oldi.

- Ushbu qurilma, texnika kira olmaydigan tomorqalar uchun qo‘l keladi. Qurilmani qulayligi 70 sm kenglikda olingan jo‘yakka qator orasi 15 sm, urug‘ oralig‘i 8-9 sm masofada loviya va makkajo‘hori ekinlarini ekadi. Yoqilg‘i sarf qilinmaydi. Hozirda uni yanada mukammalllashtirish ustida ish olib boryapmiz, - deydi Nurmuhammad Fayzullayev.

Tanlovning yana bir iqtidorli ishtirokchisi Bog‘ishamol Sanoat kolleji talabasi Furqat Ko‘liyev tomonidan ishlangan innovatsion avto yuvish shahobchasida suvni qayta ishlab foydalanish loyihasi yig‘ilganlarda alohida qiziqish uyg‘otdi.

Shuningdek, Samarqand tayanch tibbiyot kolleji talabasi Maftunaxon Ikromova tomonidan ishlangan “innovatsion qo‘g‘irchoq” loyihasi ham hakamlar tomonidan yuqori baholandi.

- Bu kabi tanlovlarning tashkil etilishi, iqtidorli yoshlarni izlab topish, ularni har tomonlama qo‘llab-quvvatlash bilan bir qatorda, yosh innovatsiyachilarni yangi-yangi g‘oyalar, kashfiyotlar va ixtirolar sari undaydi, - deydi Maftunaxon Ikromova.

Tanlov  yakuniga ko‘ra, “Innovatsion qo‘g‘irchoq” loyihasi muallifi M.Ikromova birinchi o‘ringa, “Urug‘ ekish qurilmasi” loyihasi muallifi Nurmuhammad Fayzullayev ikkinchi o‘ringa, “Osma yo‘lovchi tashish transpot vositasi” loyihasi muallifi Damirxon Qosimov uchinchi o‘ringa munosib deb topilib, respublika bosqichida ishtirok etadi. Shuningdek “Eng yosh innovatsion g‘oya muallifi”, “Eng samarali innovatsion loyiha muallifi”, “Kichik biznes uchun eng istiqbolli innovatsion loyiha muallifi”, “Eng yaxshi innovatsion ishlanma muallifi” kabi nominatsiyalar bo‘yicha g‘oliblar aniqlandi.

G‘oliblar tashkilotchilar tomonidan diplom va esdalik sovg‘alari bilan taqdirlandilar.

Baxtigul Qarshiyeva

O‘zLiDeP Samarqand viloyat Kengashi

matbuot kotibi

O‘zLiDePning Facebook hamda Instagram'dagi rasmiy sahifasi va Telegram’dagi kanaliga a’zo bo‘lib, so‘nggi yangiliklardan xabardor bo‘ling!