“Chak” mahallasi  Kosonsoy tumanining chegaraoldi, chekka hududlaridan biri hisoblanadi. Shu bois mazkur hudud boshqa mahallalarga nisbatan rivojlanishdan biroz ortda qolgan. Ammo mahalla ahli mehnatkash, g‘ayratli, tashabbuskor xalq.

Prezidentimiz tomonidan imzolangan “Aholi bandligini ta’minlash borasidagi ishlarni takomillashtirish va samaradorligini oshirish chora-tadbirlari to‘g‘risida”gi Qarorining qabul qilinishi kosonsoyliklar uchun ayni muddao bo‘ldi. Chunki qarorga muvofiq, endilikda qishloqlarda sartaroshxona, chevarxona, poyabzal ta’mirlash xizmatlarini yo‘lga qo‘ygan yakka tartibdagi tadbirkorlar 2023 yil 1 iyulgacha barcha turdagi soliqlar to‘lashdan ozod etiladi.

Ayniqsa, qishloq joylarda doimiy ish o‘rinlari tashkil etuvchi tadbirkorlik sub’ektlarini qo‘llab-quvvatlash uchun tijorat banklarida garovsiz imtiyozli kredit mablag‘lari ajratilishi tadbirkorlarni rag‘batlantirish bilan bir qatorda, olis hududlarda sanoat va ishlab chiqarishni rivojlantirishga keng imkoniyat yaratadi.

Qarorning yana bir muhim jihati shundaki, shaxsiy tomorqa va dehqon xo‘jaliklarida ishlab chiqarishni rivojlantirishni maqsad qilganlarga ish haqining 500 baravarigacha bo‘lgan miqdorda 3 yillik muddatga, 6 oylik imtiyozli davr bilan mikrokreditlar ajratilishi belgilandi. Bu o‘z navbatida, odamlarni har bir qarich yerdan samarali foydalanishi uchun keng imkoniyat yaratadi. Boisi hududimizda bo‘sh turgan, qarovsiz yaylov yerlar juda ko‘p. Mazkur imtiyoz odamlarni bo‘sh yerlarda yong‘oq, bodom va pistazorlar tashkil etishga  rag‘batlantiradi.

Bir so‘z bilan aytganda, ushbu qaror aholini tadbirkorlikka jalb etish barobarida, qishloqlarda doimiy ish o‘rinlarini tashkil etib, ishga muhtoj yoshlar va xotin-qizlar bandligini ta’minlashga xizmat qiladi.

Anvar TURAXODJAYEV,

Xalq deputatlari Namangan viloyat

 Kengashidagi partiya  deputatlik guruhi a’zosi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!