O‘zLiDeP Siyosiy Kengashi Ijroiya qo‘mitasi hamda Samarqand viloyat va tuman Kengashlari xodimlari, mahalliy Kengash deputatlari faollari Ishtixon tumanidagi “Xumo” MFYga qarashli “Xina” qishlog‘i aholisi bilan uchrashdi.

Uchrashuvlarda “Har bir oila-tadbirkor” va “Yoshlar – kelajagimiz” dasturlari doirasida tadbirkorlik bilan shug‘ullanmoqchi bo‘lgan yoshlarga va har bir oilaga imtiyozli kreditlar ajratilishi to‘g‘risidagi eng muhim ma’lumotlar aniq va sodda tilda tushuntirib berildi va aholining muammolari o‘rganildi.

“Xumo” MFYga qarashli Xina qishlog‘ida yashovchi Mavlonov Shodmon bobo 10 sotixli tomorqasiga 200 ming tup tut ko‘chatini parvarishlamoqda. Shodmon bobo yer olgan holda ushbu ko‘chatlardan tutzor yaratib, pillachilikni rivojlantirmoqchi. Ushbu masalada ozgina yer kerakligini aytib o‘tdi. Bu masalani o‘rganib chiqishni partiya deputatlik guruhi a’zolari o‘z zimmasiga oldi.

Shuningdek, partiya faollari “Ahillar” ko‘chasida yashovchi Kamoliddin Pirnazarov xonadonida bo‘lishdi. U bilan suhbatda ma’lum bo‘ldiki, 100 ta tovuq yetishtirib, 10 million daromad ko‘rgan. Yosh bo‘lishiga qaramay bu borada zarur bilimlarga ega. Shu sababli, u o‘z faoliyatini kengaytirib, parrandachilik fermasini tashkil qilishi uchun 100 million so‘mlik kredit kerakligini aytib o‘tdi. Bu masalada banklarga qilgan murojaati besamar ketmoqda. Ushbu muammo bo‘yicha tegishli tashkilotlarga deputatlik so‘rovi yuborishga kelishib olindi.

Amaliy uchrashuvlar davomida alohida faollik ko‘rsatgan, mahallada hurmatga ega va ishchi guruh faoliyatiga yaqindan yordam bergan 5 nafar mahalla faollari partiyaning targ‘ibot-tashviqot guruhi tarkibiga kiritildi.

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!