Qo‘rg‘ontepa tumanidagi “Khantex Group” MChJ klaster usulida paxta hosili yetishtirib, dunyo andozalari darajasida mahsulotlar ishlab chiqarishga ixtisoslashgan.

Joriy yilning oktabr oyidan yigiruv fabrikasi ishga tushgan bo‘lsa, yil oxirida to‘quv, 2019 yilning birinchi choragida bo‘yoq, ikkinchi choragida esa tikuv fabrikalari ishga tushadi. Natijada kuniga 30 tonna paxta tolasi qayta ishlanib, shu kunning o‘zida tayyor mahsulotlarga aylantiriladi.  

Aytish joiz, hozirda ushbu majmua bilan yonma-yon yangi texnologiyalar asosida paxta zavodi ham qurilyapti. Qolaversa, 5 ta paxta qabul qilish punkti yuqori talab darajasida ta’mirlanib, jihozlanmoqda.

Darvoqe, mazkur korxona O‘zLiDeP Andijon viloyat Kengashi bilan doimiy hamkorlardan. Yangilikka, innovatsiyaga ishtiyoqmand yoshlar, partiya faollari ishtirokidagi tadbirlarning muntazam o‘tkazilishi bu yerda BPT tuzish uchun yetarli turtki bo‘ldi.

–“Khantex Group” qoshida partiyaning quyi bo‘g‘ini tashkil etilishi amaliyotga tatbiq qilinayotgan klaster usulini aynan mana shu tuzilma a’zolari orqali boshqa tadbirkorlik sub’ektlarida ommalashtirish imkonini beradi, – deydi partiya Andijon viloyat Kengashi bo‘lim mudiri Odinaxon Turg‘unova. – Shu bois, viloyat fermer, dehqon xo‘jaliklari va tomorqa yer egalari kengashi bilan hamkorlikda maxsus reja ishlab chiqib, shu asosda klaster usulini keng yoyishni rejalashtirganmiz.

Shuhratbek BOZOROV,

O‘zLiDeP Andijon viloyat

Kengashi huzuridagi

Siyosiy ta’lim markazi rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!