Jizzaxlik faxriylarimiz faoliyati samaradorligining siri nimada?
11.06.2024, 11:55
Yoshi ulug‘, boy hayotiy tajribaga ega nuroniy insonlarga hurmat-ehtirom ko‘rsatish, ularning maslahatlari va o‘gitlariga amal qilish xalqimiz mentalitetiga xos bo‘lgan xususiyatlardan biridir.
Viloyatimizdagina emas, balki respublikamizda ham obro‘ qozongan insonlar - O’zbekiston Qahramoni Parda Ziyotov, “Nuroniy” jamg‘armasi viloyat bo‘limi raisi Norqul Nusharov, Buvsara Qarabekova kabi taniqli fermerlar, tadbirkorlar, quruvchilar, olim, shifokor va boshqa soha vakillaridan iborat 214 nafar tajribali maslakdoshlarimiz o‘rin olgan O’zLiDeP Jizzax viloyat hududiy partiya tashkiloti tarkibidagi Faxriylar Kengashi faoliyatiga nazar solsak bunga yana bir bor amin bo‘lishimiz mumkin.
Ular faoliyatida, hisobot uchun emas, balki el-yurt, partiya manfaati uchun sidqidildan qilingan amaliy ishlar mo‘lroq. Chunki, faxriylarimiz har bir insonning quvonchi tashvishini o‘zlariniki kabi qabul qilishga, yutuqlardan suyunishsa, muammolardan kuyunib, unga yechim topishga o‘rganishgan.
Misol uchun, “Har bir nuroniy - besh nafar yoshga murabbiy”, tamoyili asosida joylardagi tarbiyasi og‘ir, ma’naviy ko‘makka muhtoj, uyushmagan, ishsiz yoshlar bilan ishlashning yo‘lga qo‘yilishi natijasida o‘nlab yoshlarimizning muammolariga yechim topildi. Ularning bandligi ta’minlanib, tadbirkorlikka jalb qilindi.
Faxriylarimizning mahallalarda amalga oshirayotgan ishlari ayniqsa diqqatga sazovor. Joriy yil aprel oyida Prezidentimizning Jizzax viloyatiga tashrifi chog‘ida mahallalarda bunyodkorlik jarayonlarini jadallashtirish, tomorqachilik, oilaviy va xususiy tadbirkorlikni rivojlantirish, mahallalarni tom ma’noda gullab yashnagan, ma’naviyat maskanlariga aylantirish borasida bir qator vazifalar belgilab berildi. Bugungi kunda ushbu vazifalar ijrosini ta’minlashda faxriylarimiz alohida jonbozlik ko‘rsatmoqdalar.
Jizzax viloyatida 309 mahalla mavjud. Joriy yilning birgina aprel oyida viloyatimizdagi 2 741 ta xonadonga ajratilgan kredit mablag‘lari evaziga 22 005 nafar fuqarolarning bandligi ta’minlandi. Ulardan 13200 nafari o‘zini o‘zi band qilgan fuqarolar bo‘lsa, 593 nafar yurtdoshlarimiz yakka tartibdagi tadbirkorlikka jalb qilindi. 1669 ta yangi dehqon xo‘jaliklari ish boshladi. Bu jarayonlarda Faxriylar Kengashi a’zolarining munosib ulushi borligi biz uchun faxr.
Joriy yil iyun oyida viloyatimiz mahallalarida mingdan ortiq mikroloyihalari amalga oshirish rejalashtirilgan. Bu esa yangi ish o‘rinlari yaratishda juda qo‘l kelishi tabiiy.
Mahallalarni hukuqbuzarlikdan holi maskanlarga aylantirish, yoshlarimizni oilaviy qadriyatlarni e’zozlashga chorlashda ham faxriylarimizning munosib hissalari bor. O’tgan vaqt davomida faxriylarimiz har bir mahallada bu borada uchrashuvlar, suhbatlar o‘tkazishdi. Eng muhimi, bu jarayonga rasman yondashmay, har bir xolatda muammo alohida o‘rganilmoqda, har bir yurtdoshimiz, u xoh ota-onalar, xoh yoshlar bo‘lsin dildan suhbatlashilmoqda. Shundan so‘ng “mahalla yettiligi” vakillari, hamkor tashkilotlar, deputatlar bilan birga muammoga yechim izlanmoqda. Bu esa o‘zining ijobiy samarasini bermoqda.
Faxriylarimiz aholi o‘rtasida sog‘lom turmush tarzini shakllantirishda, jismoniy tarbiya va sportni ommalashtirishda shaxsiy ibrat ko‘rsatishayotgani esa alohida tahsinga loyiq. “Shijoatli keksalar” maxsus sport musoboqalariga nafaqat partiyamiz faxriylari, balki mahallalardagi nuroniylar ham jalb qilinmoqda. Bu esa ularning farzandlari, nevaralariga ibrat maktabi vazifasini o‘tamoqda.
Yangi O’zbekistonimizni gullab yashnagan, taraqqiy topgan, xalqimiz farovon yashaydigan o‘lkaga aylantirishda, bu borada Davlatimiz rahbari tomonidan ilgari surilayotgan, partiyamiz Dasturida belgilangan maqsad va vazifalarni amalga oshirishda faxriylarimiz bundan keyin ham faollar safida bo‘lib qolaveradilar, deb ishonamiz.
Jalil KYeNJAYEV,
O’zLiDeP Do‘stlik tuman Kengashi Faxriylar Kengashi raisi, “Shuhrat” medali sohibi
O'xshash yangiliklar
-
Urganchlik talaba yoshlarning ilmiy innovasion loyihalari qo‘llab-quvvatlanad
22.06.2024, 14:51
-
Chiroqchida ishbilarmon ayollar ko‘paymoqda
22.06.2024, 14:49
-
Chetsuvlik zakovatchilar
21.06.2024, 15:56
-
O‘zLiDeP delegatsiyasi xalqaro ko‘rgazmada ishtirok etdi
21.06.2024, 13:03
-
Deputat ko‘magi bilan yosh tadbirkorlar safi ko‘paymoqda
20.06.2024, 17:27
Fikringizni qoldiring