Bu haqda xalq deputatlari Namangan shahar Kengashidagi O‘zLiDeP deputatlik guruhining navbatdagi yig‘ilishida ma’lum qilindi.

Yig‘ilishda shaharning eksport salohiyatini yanada oshirish, bu borada tadbirkorlik sub’ektlarini rag‘batlantirish borasida amalga oshirilayotgan ishlar holati yuzasidan Namangan shahar hokimi birinchi o‘rinbosari Ulug‘bek Xoliqovning axboroti tinglandi.  

–Joriy yilning 1-choragi davomida shaharda eksport rejasi ortig‘i bilan bajarilgan bo‘lsada, uning hajmini yanada ko‘paytirish uchun foydalanilmagan imkoniyatlar, hal qilinishi lozim bo‘lgan muammolar bor,  – deydi U.Xoliqov. – Shu bois eksport ko‘lamini kengaytirish uchun eng avvalo, korxona va  tadbirkorlik sub’ektlari rahbarlarida huquqiy, iqtisodiy bilimlarni oshirish darkor. Yana bir muammo. Bugun dunyo bozoridagi narxlar kun sayin o‘zgarib turibdi. Bu esa  eksportchilarga, ayniqsa, mavsumiy harakterga ega bo‘lgan meva-sabzavotlarni xorijga chiqarmoqchi bo‘lgan tadbirkorlarga turli qiyinchiliklar tug‘dirmoqda. Shu sabab ushbu jihatlarni inobatga olgan holda shaharda 16 ming tonna sig‘imga ega bo‘lgan xolodilniklar hajmini 20 ming tonnaga chiqarish choralarini  ko‘ryapmiz.

Yig‘ilishda shuningdek, kun tartibidagi ikkinchi masala yuzasidan viloyat avtomobil yo‘llari hududiy boshqarmasi bo‘lim boshlig‘i Hakimjon Yakubboyev hamda shahar bo‘yicha vakil  G‘ofirjon Habibullayevlarning hisoboti eshitildi.  

Yig‘ilishda mutasaddilar tomonidan 2018 yilning 1-choragi davomida  Namangan shahridagi ichki yo‘llarni ta’mirlash, ajratilgan mablag‘larning o‘zlashtirilishi yuzasidan aniq ma’lumot berilmagani uchun hisobot deputatlik guruhi a’zolari tomonidan qoniqarsiz deb baholandi.

Mazkur masalaga shahar hokimining birinchi o‘rinbosari Ulug‘bek Xoliqov oydinlik kiritib, shahardagi “Orzu”, ”Majnuntol”, “Ilg‘or”, ”Chamanzor” kabi mahallalarda homiylik yo‘li bilan yo‘llarni ta’mirlash ishlari olib borilayotganligini ma’lum qildi.

Yig‘ilishda muhokama qilingan har ikki masalani xalq deputatlari Namangan shahar kengashining navbatdagi sessiyasiga kiritishga kelishib olindi.

Komiljon FAYZIYEV,

O‘zLiDeP faoli

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!