Айни кунларда O‘zLiDeP Жиззах вилоят Кенгаши томонидан жойларда Мустақиллигимизнинг 32 йиллик санаси муносабати билан “Янги ҳаёт учун, Янги Ўзбекистон учун” шиори остида турли хил маданий-маърифий тадбирлар, кўргазмалар, учрашув ва давра суҳбатлари ташкил этилмоқда.

Мазкур тадбирларда партия фаоллари ва депутатлар томонидан Истиқлолнинг 32 йиллик тўйини муносиб қарши олиш борасида қилинаётган амалий ишларни, шунингдек, жорий йил 18 август куни  Давлатимиз раҳбарининг тадбиркорлар билан бўлиб ўтган очиқ мулоқотида айтиб ўтган  кичик бизнес ва тадбиркорликни ривожлантириш борасидаги устувор йўналишларни, илгари сурилган ташаббусларни кенг жамоатчиликка, айниқса, ўз бизнесини бошлаш иштиёқидаги ҳамюртларимизга етказишга ҳам алоҳида эътибор қаратилмоқда.

O‘zLiDeP  Мирзачўл туман Кенгаши фаоллари ҳамда  халқ депутатлари Жиззах вилоят Кенгаши депутати, таниқли тадбиркор  Сабоҳат Азимова ташаббуси билан  ташкил этилган ана шундай тадбирлардан бири -  “Ҳар бир кун – бу имконият, ҳар бир кун – бу келажак пойдевори” деб номланди.

Тадбирда туманда қуроқчилик, каштачилик ва бошқа соҳаларда фаолият олиб бораётган тадбиркорлар ҳамда илғор томорқачилар томонидан етиштирилган маҳсулотлар кўргазмаси ҳам ташкил этилди.

Бўлиб ўтган мулоқотлар чоғида мустақиллигимиз сабаб қўлга киритилган ютуқлар, айниқса, сўнгги етти йилда туманда амалга оширилган улкан бунёдкорлик жараёнлари, тадбиркорликни ривожлантириш, янги иш ўринлари яратиш борасида амалга оширилаётган ишлар хусусида сўз юритилди. Президентимизнинг тадбиркорлар билан бўлган очиқ мулоқотини кузатиш давомида юзага келган фикрлар қизғин муҳокама қилинди.

 - Эл фаровонлиги мустақиллик тушунчаси билан узвий боғлиқ. Байрам руҳи кезиб юрган ушбу кунларда, Президентимизнинг тадбиркорлар билан қилган очиқ мулоқоти, айниқса, ўзига хос аҳамиятга эга бўлди, - дейди Сабоҳат Азимова. - Чунки, очиқ мулоқотда Президентимиз томонидан  кичик бизнес  вакилларини тадбиркорликка ўқитиш, уларга лойиҳа қилиб бериш, фаолиятини молиялаштириш, маҳсулотларига бозор ва бизнесига шериклар топиш бўйича яхлит экотизим яратилиши айтиб ўтилди.

Тадбирда таъкидланганидек, эндиликда,  “Қишлоқ қурилиш банк” -  “Бизнесни ривожлантириш банки”га айлантирилади. Банк ҳузурида ҳар бир ҳудудда жами 14 та кичик бизнес марказлари ташкил этилади. Уларда ўқиган тадбиркорларнинг лойиҳаларини энг қулай шартларда молиялаштирилади. Бу дастурда иштирок этаётган кичик бизнес корхоналари фаолиятини уч йилгача текширишга йўл қўйилмайди.  Умуман, кичик бизнесда камида 150 мингта субъектни “оёққа турғизиш”, 25 мингтасини ўрта корхоналарга айлантириш, соҳада 250 мингта янги доимий иш ўрни яратиш мақсад қилинган. Яратилаётган бу имкониятлардан мирзачўллик кичик бизнес вакиллари ҳам унумли фойдаланиб, Ватанимиз тараққиётига, мустақиллигимизни мустаҳкамлашга ўзларининг муносиб ҳиссаларини  қўшишади.

Ўзига хос усулда ташкил этилган мазкур тадбир давомида тумандаги тадбиркорлар, кичик бизнес вакиллари, томорқачилар ўзаро  яқиндан мулоқот қилибгина қолмай, бир-бирларининг ишларини кузатиш,  тажриба алмашиш имконига ҳам эга бўлишди.

Бобомурод Эгамов,

O‘zLiDeP Мирзачўл туман Кенгаши аппарат раҳбари