Шахсий намуна, тажриба – ибрат мактаби. Шу сабаб, айни кунларда ҳудудларда ташкил этилаётган тадбиркорларнинг аҳоли билан учрашувлари – тадбиркорликни ривожлантиришда, соҳага оид янгиликларни тарғиб қилишда жуда катта аҳамиятга эга.

Маҳаллий Кенгаш депутатлари, партия фаоллари, ҳамкор ташкилотлар ва электорат вакиллари фаол иштирок этаётган ана шундай учрашувлар Бахмал туманида ҳам ташкил этилмоқда. 

Партия туман Кенгаши ташаббуси билан “Шуҳрат” медали соҳиби, “Ишбилармон аёл” республика кўрик- танловининг туман босқичи ғолиби, “Чеварлик сари” масъулияти чекланган жамияти раҳбари Муҳайё Баратова иштирокида аҳоли билан учрашув ташкил этилди.

Муҳайё Баратова етакчилик қилаётган жамиятда бугунги кунда  “Аёллар дафтари”га киритилган хотин-қизлар, ижтимоий ҳимояга муҳтож бўлган аёлларнинг бандлигини таъминлашга алоҳида эътибор қаратилган. Жамиятда 25 нафар тикувчи ва 25 нафар касаначи иш билан таъминланган бўлиб, 10 хил турдан ортиқ маҳсулот ишлаб чиқарилмоқда.

Тадбир иштирокчилари нафақат мазкур жамият фаолияти билан  балки, тумандаги ҳунармандчилик, тикувчилик, қуроқчилик, каштачилик, рўмол тўқиш ва чопон тикиш борасидаги амалий ишлар натижалари акс этган кўргазма билан яқиндан танишдилар. Тикувчиликка қизиқадиган хотин-қизлар учун “маҳорат дарси” ташкил этилди.

Учрашув давомида бўлиб ўтган очиқ мулоқотда эса тадбиркор ўз меҳнат фаолияти, бу борада орттирган тажрибалари, режалари ҳақида йиғилганларга сўзлаб берди. Тадбиркор ўз бизнесини йўлга қўйиш иштиёқида бўлган фуқароларнинг саволларига атрофлича жавоб қайтарар экан, бу борада уларни имкон қадар қўллаб-қувватлашга тайёрлигини билдириб ўтди.

Неъматилла Тугалов.

O'zLiDeP Бахмал туман кенгаши аппарат раҳбари