Тадбиркорлар ва ишбилармонлар ҳаракати – Ўзбекистон Либерал-демократик партиясининг Самарқанд вилояти ва туман (шаҳар) партия ташкилотлари иштирокидаги кенгайтирилган ижроия қўмита йиғилиши бўлиб ўтди.

Йиғилишда вилоят Кенгаши ижроия қўмитаси аъзолари, вилоят, туман ва шаҳар Кенгашлари масъул ходимлари иштирок этди.

Тадбирда партия вилоят, туман ва шаҳар Кенгашларининг 2023 йилнинг ўтган даврдаги жорий фаолияти якунлари, иккинчи ярим йилликдаги устувор вазифалар, туман ва шаҳар Кенгашлари ва депутатлик гуруҳлари фаолиятлари танқидий таҳлил қилинди. Ўтган давр давомида ўтказилган тадбирлар, партиявий лойиҳалар муҳокама қилинди.

Партия Устави талабларига қуйи тузилмалар томонидан қай даражада амал қилинаётгани, партия раҳбар органлари томонидан белгилаб олинаётган режа ва топшириқлар ижросининг натижадорлиги билан боғлиқ масалалар кўриб чиқилди.

Ҳисоботда таъкидланганидек, жорий йилнинг ўтган давр мобайнида партия депутатлик гуруҳлари ташаббуслари билан халқ депутатлари Самарқанд вилоят ва туман (шаҳар) Кенгашлари сессияларига 28 та масала киритилиб, шундан 26 таси сессияларда кўриб чиқилган ва қарор қабул қилинган.

Шунингдек, бу вақт давомида депутатлар томонидан 1264 та депутатлик сўрови чиқарилган. Шундан, 320 таси вилоят депутатлари томонидан юборилган бўлса, 944 таси туман (шаҳар) Кенгашидаги депутатлар ҳиссасига тўғри келади.

Йиғилиш давомида партия сафига аъзоларни қабул қилиш, янги бошланғич партия ташкилотларини очиш, Сиёсий Кенгаш Ижроия қўмитасининг 2023 йилда тасдиқланган тегишли қарорига асосан аъзолик бадалларини ундириш каби масалалар муҳокама қилинди.

Тадбирда партия депутатлик гуруҳлари фаолиятини янада жонлантириш, кучли депутатлик назоратини олиб бориш, сайловчилар муммолари ва мурожаатларини мунтазам ҳал қилиб бориш каби масалаларда фаоллик талаб этилиши таъкидлаб ўтилди.