O‘zLiDeP Андижон вилоят Кенгаши Балиқчи туман ҳокимлигида сайёр қабул ташкил этди. Унда “Марказ”, “Бўстон”, “Авесто”, “Туркистон” маҳалласи аҳли томонидан келиб тушган 20га яқин муаммолар ўрганилди.

“Авесто” маҳалласида яшовчи Мавлуда Холбўтаева ҳам кўпдан бери ўзини қийнаётган муаммога мутасаддилар кўмагида жавоб топганидан хурсанд.

– Очиғини айтаман, турмуш шароитимиз оғир, – дейди у. – Ижара уйда яшаймиз. Ишга жойлаштиришни сўраб бир неча жойга мурожаат қилдик, аммо натижа бўлмади. Шу сабаб ижара ҳақини ҳам ўз вақтида тўлолмаяпмиз. Бугунги сайёр қабулдаги мурожаатимдан сўнг O‘zLiDeP фаоли туманимиздаги “Зебо тонги” фермер хўжалиги раҳбари томонидан тўланмаган ижара тўловларимнинг тўлаб берди.

“Туркистон” маҳалласида яшовчи Дилмурод Матмуродов оиласи ҳам сайёр қабулда муаммосига ечим топди. Хонадон аъзоларининг моддий таъминоти етарли эмас, ишсизлик уларга ҳам соя солаётган эди. Бунинг устига жажжи қизчаси хасталикка чалинган, даволатишга эса имкони йўқ эди.

Сайёр қабул давомида фуқаро мутасаддилардан иш сўраб мурожаат қилди. Унинг мурожаати депутат М.Яқубова томонидан эътиборга олиниб, муаммо жойида ҳал қилинди. Оила соҳиблари жамоатчилик асосида ишга жойлаштирилди, фарзандига эса Андижон тиббиёт институти клиникасига бепул даволаниш учун йўлланма берилди.

Тадбиркор Олимжон Воҳидов “Марказ” маҳалласида яшайди. У трикотаж маҳсулотлари ишлаб чиқаришга мўлжалланган фаолиятини кенгайтириш учун туманда бўш турган бинолардан бирини “ноль” қийматда олишда кўмак сўради. Унинг мурожаати ҳам жойида кўриб чиқилиб, туман ҳокимлиги мутасаддиси томонидан маҳалладаги фойдаланилмай турган бино инвестиция киритиш ва янги иш ўринлари яратиш шарти билан “ноль” қийматда бериладиган бўлди.  

Шунингдек, сайёр қабул давомида аҳоли вакиллариннг томорқачилик ва ҳунармандчиликни йўлга қўйиш учун имтиёзли кредит олишда кўмаклашиш, тадбиркорлик фаолияти учун бизнес-лойиҳа тайёрлаш сингари масалаларига мутахассислар томонидан ижобий жавоблар қайтарилди.

Оқибатхон ЖАКБАРОВА,

O‘zLiDeP Балиқчи туман

Кенгаши раиси

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!