O‘zLiDeP Andijon viloyat Kengashi Baliqchi tuman hokimligida sayyor qabul tashkil etdi. Unda “Markaz”, “Bo‘ston”, “Avesto”, “Turkiston” mahallasi ahli tomonidan kelib tushgan 20ga yaqin muammolar o‘rganildi.

 “Avesto” mahallasida yashovchi Mavluda Xolbo‘tayeva ham ko‘pdan beri o‘zini qiynayotgan muammoga mutasaddilar ko‘magida javob topganidan xursand.

– Ochig‘ini aytaman, turmush sharoitimiz og‘ir, – deydi u. – Ijara uyda yashaymiz. Ishga joylashtirishni so‘rab bir necha joyga murojaat qildik, ammo natija bo‘lmadi. Shu sabab ijara haqini ham o‘z vaqtida to‘lolmayapmiz. Bugungi sayyor qabuldagi murojaatimdan so‘ng O‘zLiDeP faoli tumanimizdagi “Zebo tongi” fermer xo‘jaligi rahbari tomonidan to‘lanmagan ijara to‘lovlarimning to‘lab berdi.

“Turkiston” mahallasida yashovchi Dilmurod Matmurodov oilasi ham sayyor qabulda muammosiga yechim topdi. Xonadon a’zolarining moddiy ta’minoti yetarli emas, ishsizlik ularga ham soya solayotgan edi. Buning ustiga jajji qizchasi xastalikka chalingan, davolatishga esa imkoni yo‘q edi.

Sayyor qabul davomida fuqaro mutasaddilardan ish so‘rab murojaat qildi. Uning murojaati deputat M.Yaqubova tomonidan e’tiborga olinib, muammo joyida hal qilindi. Oila sohiblari jamoatchilik asosida ishga joylashtirildi, farzandiga esa Andijon tibbiyot instituti klinikasiga bepul davolanish uchun yo‘llanma berildi.

Tadbirkor Olimjon Vohidov “Markaz” mahallasida yashaydi. U trikotaj mahsulotlari ishlab chiqarishga mo‘ljallangan faoliyatini kengaytirish uchun tumanda bo‘sh turgan binolardan birini “nol” qiymatda olishda ko‘mak so‘radi. Uning murojaati ham joyida ko‘rib chiqilib, tuman hokimligi mutasaddisi tomonidan mahalladagi foydalanilmay turgan bino investitsiya kiritish va yangi ish o‘rinlari yaratish sharti bilan “nol” qiymatda beriladigan bo‘ldi.  

Shuningdek, sayyor qabul davomida aholi vakillarinng tomorqachilik va hunarmandchilikni yo‘lga qo‘yish uchun imtiyozli kredit olishda ko‘maklashish, tadbirkorlik faoliyati uchun biznes-loyiha tayyorlash singari masalalariga mutaxassislar tomonidan ijobiy javoblar qaytarildi.

Oqibatxon JAKBAROVA,

O‘zLiDeP Baliqchi tuman

Kengashi raisi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!