Тайлоқ тумани “Файзобод” маҳалласида ўз томорқасидан яхши даромад олиб, рўзғорини тўкин, турмушини обод қилаётган омилкорлар кўп. Шу ҳудудда яшовчи Эркин Раҳимов ҳам 35 сотих ер майдонига иссиқхона ташкил этиб, баракали ҳосил олиб келаётган ишбилармонлардан бири.

Айни чоғда у раҳбарлик қилиб келаётган “Эркин Раҳимов бошлиқ фермер ҳўжалиги”да маккажўрининг истеъмолбоп нави етиштирилмоқда.

–Юртимиз бозорларида маккажўҳорининг бу навига талаб катта, уларни бозорга эрта чиқарсак, кўпроқ даромад кўрамиз, – дейди  Э.Раҳимов. –Шу боисдан бу экинни иссиқхонада етиштиришни йўлга қўйдик. Ҳозирда иссиқхонамизда 10 га яқин ёшлар меҳнат қилмоқда. Маккажўҳорининг ўзидан йилига 100 миллион сўмга яқин даромад қиламиз. Шукрки,  хонадонимиз обод, рўзғоримизда барака бор.

Тумандаги “Тепақишлоқ” маҳалласида яшовчи  Шафоат ая Норматова ҳам 8 сотихлик ерда деҳқончилик  қилиб, шу меҳнати ортидан катта рўзғорини обод этиб келмоқда. Ҳозирда онахоннинг томорқасида картошканинг янги навлари етиштирилмоқда. Оила вакиллари томорқасидан йилига 4-5 тонна  картошка олиб, 15 миллион сўм фойда кўришни мўлжаллаяпти.

– Ҳовлидаги экинларнинг яшнаб туришида менинг ҳиссам бор. Болаларимга  экин экинглар, чопиқ қилинглар, деб айтмасам қилишмайди, – дейди Шафоат ая. – O‘zLiDeP фаолларининг уйимизга келиб, томорқадан самарали фойдаланиш ҳамда иссиқхона ташкил этиш бўйича берган зарур кўрсатмалари ерга бўлган меҳримизни янада оширди. Келгусида ўз томорқамизда иссиқхона ташкил этиб, қўшимча даромад олиш учун рўзғоримиздан ортганини бозорга сотишни мақсад қилганмиз.

Таъкидлаш керак, энг чекка ҳудудларга кириб бораётган “O‘zLiDeP бошланғич партия ташкилотлари ўз томорқасида фаолиятини бошлаганларга кўмакдош” лойиҳаси ҳудудда тадбиркорлар сафини янада кенгайтиришда яхши самара бермоқда. Лойиҳа доирасида партия фаоллари тумандаги 6 хонадонда бўлиб, хонадон эгаларига томорқадан самарали фойдаланиш бўйича зарур тавсиялар бердилар.

Шунингдек, O‘zLiDeP вилоят Кенгаши вакиллари лойиҳа доирасида   Оқдарё туманидаги  “Ўзбекистон” МФЙ даги “Болта” қишлоғида яшовчи  Ориф Даминов  хонадонида бўлдилар.

– Ҳар йили рўзғор учун зарур помидор, бодринг ёки бошқа резаворларни томорқамизда етиштирамиз, – дейди Ориф Даминов. –Бирорта маҳсулотни ҳам бозордан сотиб олмаймиз, ортганини сотамиз.

 Учрашувда партия фаоллари томонидан томорқачига фаолиятини кенгайтириш учун кредит олиш, иссиқхона ташкил қилса, куз, қиш фаслларида ҳам қўшимча даромад топиши мумкинлиги ҳақида тушунчалар берилди.

Бахтигул ҚАРШИЕВА,

O‘zLiDeP Самарқанд вилоят Кенгаши

матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!