Аввал хабар берганимиздек, O‘zLiDeP Сиёсий Кенгаши Ижроия қўмитасининг навбатдаги йиғилишида хусусий мулк дахлсизлиги таъминлаш, халқ депутатлари Кенгашларидаги партия гуруҳларининг мулкдорлар синфи вакилларининг қонуний манфаатларини ҳимоя қилиш, мулк ва мулкий муносабатларни қонуний тартибга солинишини таъминлашдаги иштирокини янада кучайтириш масалалари муҳокама қилинган эди. 

Унда сўз олган O‘zLiDeP Сиёсий Кенгаши Ижроия қўмитаси котибият мудири Нуриддин Муротов  мулк дахлсизлигини таъминламасдан иқтисодий ривожланишга эришиш қийин эканлигига урғу берган эди. Бу Ўзбекистон Конституциясида ҳам энг олий нормалардан бири сифатида белгилаб қўйилган, хусусий мулк бошқа мулк шакллари каби дахлсиз ва давлат ҳимоясида эканлиги кўрсатиб ўтилган. Мулкдор фақат қонунда назарда тутилган ҳолларда ва тартибдагина мулкидан маҳрум этилиши мумкин дея қатъий белгиланган, деди Нуриддин Муротов.

“Қонуннинг ижроси таъминлаш ўрнига топшириқнинг ижросини биринчи навбатга чиқариб қўйяпмиз. Натижада кўчмас мулк бузилаётганда мулкдорни огоҳлантириш муддати билан боғлиқ ҳуқуқ ҳамда компенсация тўлови, шартлари ва муддати билан боғлиқ ҳуқуқ бузилиш ҳолатлари юзага келяпти, айрим ҳолатларда эса компенсация тўлови умуман тўланмаяпди”, – деди Н. Муротов.

Н.Муротов қуйидаги таклифларни ҳам билдириб ўтган:

- Ер участкалари ноқонуний олиб қўйилганлиги муносабати билан мулкдорларга зарар етказилганлиги учун мансабдор шахсларнинг жавобгарлигини кучайтириш;

- ҳокимларнинг ер участкасини олиб қўйиш ва уйни, бошқа иморатларни, иншоотларни бузиб ташлаш ёки дов-дарахтларни қўпориб ташлаш тўғрисидаги қарор аҳоли пунктларининг бош режаларига, шунингдек турар жой даҳалари ҳамда кичик даҳаларини батафсил режалаштириш ва қуриш лойиҳалари тегишлича маҳаллий Кенгашларда тасдиқланиши лозим.