Олий Мажлис Қонунчилик палатасидаги O’zLiDeP фракцияси аъзоси Бобур Бекмуродов барча дўконлар ва етказиб бериш компанияларига қатъий талаблар қўйишни таклиф қилди. Унинг таъкидлашича, етказиб бериш хизматлари ва озиқ-овқат дўконлари коронавируснинг кенг тарқалишида “қайноқ нуқталар” сифатида қолмоқда.

“Ҳукумат сўнгги ойлар давомида янги коронавируснинг мамлакатимизда тарқалишини олдини олишга қаратилган кескин ва муҳим қарорларни қабул қилди.

Сўнгги қарорлардан бири – хайрия ишларини марказлаштирилган тартибда Мувофиқлаштириш марказлари томонидан амалга оширилиши, гарчи кўнгиллилар ишини қийинлаштираётган бўлсада, бу мушкул даврнинг табиий камчилиги ва қатъий санитар талаблар сифатида қабул қилиниши лозим.

Шу билан биргаликда, етказиб бериш (доставка) хизматлари ва озиқ-овқат дўконлари янги коронавируснинг кенг тарқалиши рискини кучайтираётган “қайноқ нуқталар” сифатида қолмоқда.

Жумладан, кунига юзлаб, минглаб одамларга хизмат кўрсатаётган дўконлар сотувчилари ҳамда етказиб бериш хизматлари курьерларининг ниқобсиз ва қўлқопларсиз фаолият олиб бораётганлиги, меҳнат анжомларини дезинфекция қилмаётганлиги, бинони дезинфекция қилиш кўпи билан бир-икки марта ўтказилаётганлиги – амалга оширилаётган тадбирлар самарадорлигига ўта салбий таъсир ўтказмоқда.

Шу сабабли, бугунги кунда ишлаётган барча дўконлар ва етказиб бериш компанияларига қатъий талаблар қўйиш, қатор янги шартларни назарда тутувчи қарорларни қабул қилиш лозим:

- Етказиб бериш хизматларини тўлиқ “мулоқотсиз етказиш” режимига ўтказиш (бесконтактная доставка), онлайн тўловлардан фойдаланиш, нақд пулни олиш ва қайтим қатаришда санитар қоидаларга риоя қилиш, дезинфекция мосламаларидан фойдаланиш, имзо чекиш учун ручка ва қоғозларни мижозга таклиф қилмаслик, товарларни ёпиқ ва гигиеник қопламаларда етказиш, курьерларнинг  хонадонларга кирмаслиги, мижоз билан 2 метр масофани сақлаши;

- Етказиб бериш хизматлари курьерларининг тўлиқ ҳимоя экипировкаларда бўлиши, сотувчиларнинг ҳар соатда алмаштириладиган ниқоб ва қўлқопда савдо-сотиқ қилиши;

- Сотувчилар ва курьерларнинг ҳар бир мижозга хизмат кўрсатгандан сўнг қўлларини ва меҳнат қуролларини тўлиқ дезинфекция қилиши;

- Дўконларда ҳар уч соатда дезинфекция қилиш, ёпиқ турдаги дўконларни шамоллатиб туриш, совуқдан асрашга мўлжалланган эшикни тўсиб турувчи плёнкаларни олиб ташлаш, эшикларнинг имкон қадар очиқ ҳолда туриши (эшикни очишда тутқичларга тегмаслик мақсадида);

- Ҳар бир дўконда дезинфекция қилиш мосламалари, дозаторли санитайзерлар, қоғоз салфеткалар ва чиқинди идишларини ўрнатиш;

- Саноат упаковкасига эга бўлмаган барча маҳсулотларнинг усти ёпиқ ҳолда сақланиши каби қатъий талабларни жорий қилиш лозим.

Шу билан биргаликда, бизнес эгалари томонидан ҳам ушбу минимал талабларни бажаришдан ташқари, имкониятга қараб қўшимча эҳтиёт чораларини кўришлари эпидемиянинг кескин тарқалишини олдини олишга хизмат қилади. Улар -  ҳозир харидорда танлаш имконияти мавжуд эмаслигини ҳисобга олишлари шарт.

Эслатма: Бош Санитар инспектор 90 минг киши карантинда эканлиги, вирус мамлакат ҳудуди бўйлаб тарқалиб юрган бўлиши мумкинлигини ҳақида огоҳлантирди” – дейди депутат.