Shahnoza bundan 14 yil avval Yashnaobod tumanidagi “Behizor” mahallasida yashovchi Eshmatovlar oilasiga kelin bo‘lib tushgan edi. Oradan o‘tgan yillar davomida yosh oila o‘zidan ko‘payib, to‘rtta farzand ko‘rdi.

Nafaqat ularning oila a’zolari ko‘paydi. Bu orada Shahnozaxonning yoniga ikki ovsin tushdi. Shu tariqa 1966 yil Toshkentda yuz bergan zilziladan keyin odamlarga vaqtincha yashab turish uchun berilgan ikki sotixli hovlida yashayotganlar soni 18 nafarga yetdi.

- Bu uylar yog‘ochdan qurilgan bo‘lib, qo‘shnilarning devori bir-biriga ulanib ketgan,-deydi Shahnoza. - Buzib qurishni iloji yo‘q. Agar buzilsa, yonidagi qo‘shnini uyi va hovlisi ochilib, devori ham qulab tushishi hech gap emas. Alohida uy-joy qilib, chiqib ketishga iqtisodiy ahvolimiz to‘g‘ri kelmaydi. 

Oila a’zolarida uy-joy xarid qilishga imkoniyat yo‘qligi bois kichik hovlida uch ovsin 12 nafar bola kun kechirmoqda. Aka-ukalar yaxshi yashash uchun nima qilmoq haqida bosh qotirib, maslahat qilib yurishganda Prezidentimiz tashabbusi bilan arzon uy-joylar qurish boshlandi.

Bunday uylarning birinchi bosqichida yetarlicha mablag‘i bo‘lmagani uchun Eshmatovlar oilasi ro‘yxatdan tushib qoldi. Ularning “Behizor” mahalla fuqarolar yig‘iniga va tuman kengashidagi O‘zLiDeP deputatlik guruhi a’zosi Yorqin Zokirovga qilgan murojaatlari ijobiy yechim topdi.

Ayni vaqtda Shahnozaxon va uning ovsiniga Sergeli tumanida qurilayotgan uy-joylardan ikkita uch xonalisi ajratib berildi. Bu uylar uchun boshlang‘ich mablag‘ni to‘lagan oilalarning quvonchi cheksiz.

- Arzon narxlarda sifatli qurilayotgan uylar biz kabi turar joyga ehtiyojmand yosh oilalar uchun katta imkoniyat bo‘ldi, – deydi Shahnozaxon. – Uylarimizga tezroq ko‘chib o‘tib, toza, ozoda, saramjon-sarishta uyda yashashni juda istaymiz. Nasib bo‘lsa, mustaqillik bayrami arafasida bitar ekan. Bu kunni bolalarim ham juda intiq bo‘lib kutyapti. Har kuni farzandlarim qurilish bo‘layotgan joyga boraylik, uyimizni ko‘rib kelaylik, deb hol jonimga qo‘yishmaydi. Bir necha marta ko‘rib ham keldik.

Ha, bugun oila a’zolarining quvonchi cheksiz. Ayniqsa, bolalar hademay, qurilishi yakunlanadigan yangi, chiroyli, keng va qulay, hovlisida bolalar uchun turli arg‘imchoqlar bo‘lgan uy-joylarga ko‘chib o‘tishni hayajon bilan kutishmoqda.

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!