O‘zLiDeP xotin-qizlarning ijtimoiy sharoitini yaxshilash, jamiyatdagi mavqeini oshirish, ayollarni tadbirkorlikka keng jalb etish maqsadida ko‘plab loyihalarni hayotga tatbiq etgan. Jumladan, “Sog‘lom oila – mustahkam oila”, “Bunyodkor ayollar”, “Ishbilarmon ayol” loyihalari fikrimizga yaqqol dalildir. Mazkur loyihalar xotin-qizlarni ishga joylashtirish, ularni ijtimoiy muhofaza qilish va qizlarni oilaga tayyorlashga xizmat qilayotir. 

Endilikda partiya xotin-qizlarning huquqlari va qonuniy manfaatlarini himoya qilish, muammolarini o‘z vaqtida aniqlash, ular  o‘rtasida huquqbuzarliklarni oldini olish, jazoni ijro etish muassasalaridan ozod qilingan xotin-qizlarning ijtimoiy reabilitatsiyasi va moslashishi bo‘yicha chora-tadbirlarni amalga oshirish, ularni tadbirkorlikka va hunarmandchilikka keng jalb etishga mo‘ljallangan yangi loyihani amalga oshirish ostonasida turibdi. Bu haqida “15 may – Xalqaro oila kuni” munosabati bilan o‘tkazilgan tadbirda ma’lum qilindi.  

Yangi loyiha taqdimotida O‘zLiDeP Siyosiy Kengashi Ijroiya qo‘mitasi xodimlari, partiya fraksiyasi a’zolari, O‘zbekiston Xotin-qizlar qo‘mitasi, partiya Toshkent shahar Kengashi faollari “Oila” ilmiy-amaliy markazi, O‘zNNTMA, “Mahalla” xayriya jamoat fondi vakillari va jurnalistlar ishtirok etdi.

 “Ayollar qanoti”ning yangi – “Farovon oila” loyihasi Prezidentimizning “Xotin-qizlarni qo‘llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to‘g‘risida”gi Farmoni ijrosini ta’minlash, shuningdek, jamiyatda xotin-qizlarning ijtimoiy-siyosiy faolligini oshirish, oila institutini mustahkamlashda davlat va nodavlat tashkilotlarining hamkorligini yanada kuchaytirish maqsadida ishlab chiqildi.

Loyiha doirasida xotin-qizlarni qo‘llab-quvvatlashga doir davlat siyosatining samarali amalga oshirilishini ta’minlash, ularning huquqlari va qonuniy manfaatlarini himoya qilish, xotin-qizlar muammolarini o‘z vaqtida aniqlashga alohida e’tibor qaratilgan. Yordamga muhtoj va og‘ir ijtimoiy ahvolga tushib qolgan hamda imkoniyati cheklangan ayollarning manzilli ro‘yxatlarini tuzish, ularga ijtimoiy-huquqiy, psixologik va moddiy yordam ko‘rsatish kabi vazifalarni amalga oshirish rejalashtirilgan. Shuningdek, xotin-qizlar o‘rtasida huquqbuzarliklarni oldini olish, huquqbuzarlikka moyilligi bo‘lganlar bilan yakka tartibda ishlash, jazoni ijro etish muassasalaridan ozod qilingan xotin-qizlarning ijtimoiy reabilitatsiyasi va moslashishi bo‘yicha davlat va nodavlat organlari bilan yaqin hamkorlikni ta’minlashga alohida e’tibor qaratilgan.  

Loyiha doirasida hamkor tashkilotlar – O‘zbekiston Xotin-qizlar qo‘mitasi, “Oila” ilmiy-amaliy markazi, O‘zbekiston nodavlat notijorat tashkilotlari milliy assotsiatsiyasi, “Mahalla” xayriya jamoat fondi bilan hamkorlikda milliy oilaviy qadriyatlarni mustahkamlash bo‘yicha maqsadli ishlar olib boriladi. Jumladan, erta nikoh va oilaviy ajrimlarni oldini olish hamda xotin-qizlar o‘rtasida huquqbuzarlik, jinoyatchilik va suitsidlar profilaktikasiga, ularning huquqiy madaniyatini oshirishga va ma’naviy-axloqiy qadriyatlarni mustahkamlashga qaratilgan tadbirlarni tashkil etish bo‘yicha aniq chora-tadbirlar dasturi belgilab olingan. Bundan tashqari, ayollarning siyosiy-huquqiy, ma’naviy-ma’rifiy, diniy, ijtimoiy-iqtisodiy ehtiyojlarini o‘rganib, ularning manfaatlarini har tomonlama himoya qilish yuzasidan takliflar berish, notinch va muammoli oilalarni o‘z vaqtida aniqlash, ulardagi ijtimoiy-ma’naviy muhitni sog‘lomlashtirish, nizoli holatlarning oldini olish va oilaviy munosabatlarni yaxshilash kabi vazifalar O‘zLiDeP yangi loyihasining ustuvor vazifasidir.

Loyiha taqdimotiga bag‘ishlangan tadbirda Prezidentimizning “Xotin-qizlarni qo‘llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to‘g‘risida”gi farmonidan kelib chiqib, “Faravon oila” loyihasini yanada takomillashtirish bo‘yicha taklif-tavsiyalar berildi.

O‘zLiDeP matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!