Paxtaobod tumani, “Shovruq” mahallasida yashovchi Bozorovlar oilasidagi notinchlik mahalladagilarni ham xavotirga solgani aniq. Aks holda O‘zLiDeP Andijon viloyat Kengashi tomonidan o‘tkazilgan ochiq muloqotda bu masala ko‘tarilarmidi?

O‘rganishlar natijasida yosh oila arzimagan sabab bilan 2,5 yil davomida parokanda bo‘layotgani aniqlandi. Oila ustuni hisoblangan erkakning birgina qaltis gapi bilan nikoh qo‘rg‘oniga darz ketishiga bir bahya qoldi.

–Oila muqaddas dargoh, – deydi O‘zLiDeP viloyat Kengashi raisining ayollar masalalari bo‘yicha o‘rinbosari Xurshidaxon Xalilova. – Uning mustahkamligiga har ikki tomon birdek javobgar. Oilada er shoh, xotin vazir vazifasini a’lo darajada bajarsagina, uni sindirib bo‘lmaydi. Shu bois ushbu oilani tiklash uchun mahalladagi namunali oilalarni ibrat sifatida ko‘rsatdik, uzoq yillar chiroyli hayot kechirib kelayotgan oila sohiblari tashrifini uyushtirdik. Mutasaddilar ko‘magi bilan birga, nihoyat, oilani qayta tiklashga erishdik.

“Ziyoli” mahallasida ham shunday oila e’tiborni tortdi. Abdumajidovlar  oilasi atigi 9 oy turmush qurganu, arzimas janjal bilan ajrim yoqasiga kelgan. Yoshlar oiladagi o‘zaro hurmat, qaynota-qaynonaga e’zoz, nikoh muqaddasligi to‘g‘risidagi tushunchalarga loqayd qaraganligi ular bilan suhbatlarda yaqqol ko‘rindi.

O‘rtada tug‘ilgan farzand ham oilani tiklash uchun sabab bo‘lolmagani dilni og‘ritadi. O‘zLiDeP viloyat Kengashi “Ayollar qanoti” tomonidan olib borilgan targ‘ibot-tashviqot ishlari natijasida yosh oila saqlab qolindi.

                   Umidaxon Isayeva,

O‘zLiDeP Andijon viloyat Kengashi

“Ayollar qanoti” bo‘limi mudiri

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!