Osiyo Ahadqulova Urgut tumanidagi “Mergancha” MFYda istiqomat qiladi. Taqdir taqozosi bilan uning ikki nafar farzandi 8 yoshli  Bexruzjon va 6 yoshli Oynuraxon  2 yoshga to‘lgach nogiron bo‘lib qolgan.

O‘zLiDeP faollaridan iborat ishchi guruh a’zolari mazkur xonadonga tashrif buyurib, xonadon sohibasi  bilan muloqot qildi. Suhbat davomida u oilasining e’tiborsiz qolganidan shikoyat qildi.

–Farzandlarim ikki yoshga kirgunicha sog‘lom edi. Peshonamizga yozilganmikin shu kunlar… Katta o‘g‘lim  ikkinchi sinf bo‘ldi. O‘qituvchi uyga tashrif buyurib dars o‘tib ketyapti. Darslarni o‘zlashtirishi sust. Toshkentdagi maxsus maktab- internatlardan biriga joylashtirish uchun murojaat qildik, lekin o‘rinlar to‘lgani uchun farzandimni qabul qilmadi,  – dedi O.Ahadqulova ko‘ziga yosh olib.

Mazkur muloqotdan so‘ng, ishchi guruh a’zolari O.Ahadqulovaning o‘g‘li Bexruzjon Muhiddinovni Toshkent shahridagi maxsus maktab-internatlaridan biriga joylashtirish uchun deputatlik so‘rovi chiqaradigan bo‘ldi. Shu bilan birga, mahalliy kengash deputatlari tomonidan tuman sog‘liqni saqlash  va ijtimoiy ta’minot bo‘limiga so‘rov yo‘llashga kelishib olindi.

O‘zLiDeP Samarqand viloyat

Kengashi matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!