O’zLiDeP Хоразм вилоят Кенгаши Ёшлар ва бизнес тузилмалар бўлими Урганч туманида Шарофат Ражапова раҳбарлик қилаётган оилавий корхона фаолияти билан танишдилар.

Оилавий корхона таркибида тикувчилик цехи, оилавий боғча, асаларичилик ҳамда маиший техника дўконлари тармоғи мавжуд.

Бундан 4 йил илгари тикувчилик цехини 20 ишчи билан бошлаган тадбиркор аёл бугун уларни 50 нафарга етказиб, маҳсулотлар экспортини ҳам йўлга қўйган. Ишчиларининг асосий қисмини “Ёшлар дафтари” рўйхатида турувчи ёш хотин-қизлар ташкил этади.

Корхона ўтган йил мобайнида 1 миллиард сўмлик тирикотаж маҳсулотларини Россия Федерацияси, Белоруссия каби давлатларга экспорт қилган. Мулоқотлар давомида тадбиркорни ўйлантираётган муаммолар ҳам муҳокама этилди. Маълум бўлишича тикувчилик цехини кенгайтириш учун бинога эҳтиёжи борлигини билдирди ва келгусидаги режалари билан ҳам ўртоқлашди.

-Юртимизда тадбиркорларга яратилган имкониятлардан самарали фойдаланган ҳолда ишлаб чиқаришни кенгайтириб, яна 200 ишчи ўрин ҳамда шахсий брендимизни яратишни, маҳсулотларимизни Германия ва Европа давлатларига экспорт қилишни ният қилганмиз, - дейди корхона раҳбари Шарофат Ражапова.

Шунингдек, ўрганишлар давомида партия вакиллари оилавий мактабгача таълим ташкилоти фаолияти билан ҳам танишдилар. 25 ўринга мўлжалланган таълим ташкилотига “Чакка кўл” маҳалласи ва қўшни маҳаллалардан келган болажонларга таълим тарбия берилмоқда. Замонавий ва барча қулайликларга эга таълим ташкилотида Шарофат Ражапова оиласининг 3 нафар келинларининг бандлиги таъминланган.

Тадбиркор  ўз боғида 30 қути асалари ҳам парваришлаб ҳар мавсумда 200 килограмдан ортиқ асал олади. Оиласи эҳтиёжидан ошган асални ички бозорга сотиб қўшимча даромад қилади. Тикувчилик цехи ва оилавий таълим ташкилотини ҳам табиий асал билан таъминлайди.

Хулоса ўрнида айтганда, юртимизда тадбиркорлик қилишга бел боғлаган фуқаролар учун барча қулайликлар мавжуд. Ишбилармонларни, айниқса, оилавий тадбиркорларни давлат томонидан қўллаб-қувватланаётгани нафақат оила даромади ошиши ва иш ўрнига эга бўлишини таъминлайди, балки мамлакат иқтисодиёти равнақига муносиб ҳисса бўлиб қўшилади. Зотан, тадбиркори кўп юртнинг тараққиёти юксак бўлади.

Севара Рўзметова,

O’zLiDeP  Хоразм вилояти Кенгаши Ёшлар

ва бизнес тузилмалар билан ишлаш бўлими мудири