Етти йилдан буён ҳар йили ўтказиб келинаётган "Ишбилармон аёл" кўрик танловнинг асосий мақсади хотин-қизларни кичик бизнес ва хусусий тадбиркорликка, фермерликка жалб этиш ҳамда бандлигига кўмаклашиш орқали ёш оилаларни қўллаб-қувватлаш, иқтидорларини рўёбга чиқариш, ташаббусларини қўллаб-қувватлашга қаратилганлиги билан муҳим аҳамият касб этади.

Танловда дастлаб тадбиркор аёллар томонидан ишлаб чиқарилган маҳсулотлар кўргазмаси бўлиб ўтди. Унда тадбиркор, ишбилармон, ҳунарманд хотин-қизларнинг маҳсулотлари, айниқса, миллий йўналишдаги либослар намойиши кўрик-танлов иштирокчиларида миллий ғурур, Ватанга муҳаббат, Мустақилликка бўлган шукроналик ҳиссини уйғотди.

Шунингдек, кўрик-танлов Низомига мувофиқ, иштирокчиларнинг хотин-қизлар учун қўшимча янги иш ўрни яратганлиги, “Аёллар дафтари”га киритилган хотин-қизларни касб бўйича ўқитган, бандлигини таъминлаган ва ҳаётда ўз ўрнини топиб кетишида кўмаклашганлиги, фаолият туридан келиб чиқиб экспортга йўналтирилган ёки импорт ўрнини босувчи маҳсулот ишлаб чиқариш, аҳолига кўрсатаётган хизматининг сифати ҳамда фаолиятида ҳаётга татбиқ этиб келаётган янги инновацион ғоялари ҳам баҳолашда алоҳида эътиборга олинди.

Кўрик-танловнинг вилоят босқичида иштирок этиш ҳуқуқини "DRESS-MAKING" хусусий корхона рахбари, O'zLiDeP фаоли Каландарова Зебо қўлга киритди.