Сайловчилар ишонган депутат

Айни кунларда O‘zLiDeP депутатлари ўз сайлов округларида “Маҳалла еттилиги” фаолиятини ўрганмоқда.

Халқ депутатлари Беруний туман кенгаши депутати Лола Хўжаниязова ўзи сайланган ҳудуд – Саркоп овулидаги аҳвол билан танишди, аҳоли вакиллари билан мулоқотда бўлди.

Овулда ижтимоий ҳимояга муҳтож оилалар ўтган йилга нисбатан камайган. Тадбиркорлик билан шуғулланиш учун мурожаат қилганлар сони ошган, аммо бундай ниятдаги ёшлар камчиликни ташкил этади. Хотин-қизларга уй шароитида ишлаш учун тикув машиналари, печлар берилган бўлса-да, лекин  улар якка тадбиркор сифатида рўйхатга олинмаган, солиқ базасига киритилмаган.

Йил бошида овул хотин-қизларининг муаммосини тизимли ҳал этиш ва “Аёллар дафтари”ни шакллантириш учун 8 нафардан иборат ишчи гуруҳ тузилиб, уйма-уй юриб, хатлов қилинди. Ҳудудда 30 ёшдан юқори 936 нафар хотин-қиз бўлиб, 28 нафари четга ишлаш учун кетган. 151 нафарида муаммоси борлиги учун “Аёллар дафтари”га киритиш учун туман оила ва хотин-қизлар бўлимига тақдим қилинди. Ҳар ойда камида 5 нафар хотин-қиз тадбиркорлик, касаначилик ва ҳунармандчиликка жалб қилинмоқда. Субсидия асосида тикув машинаси олиб берилиб, бандлиги таьминланаётир.

Профилактик ҳисобда турган  8 нафар аёл билан якка тартибда суҳбат ўтказилиб, 2 нафарига моддий, 3 нафарини ишга жойлаштириш бўйича ёрдам берилди. Профилактика инспектори ҳуқуқбузарлик ва жиноятларнинг олдини олиш мақсадида 5 та оилага ҳимоя ордери топширди. Жиноятчилик жорий йилнинг биринчи чорагида ўтган йилга нисбатан камайган. 

Ёшлар билан ишлашда ҳам муаммолар йўқ эмас. Етакчи ёшларни фақатгина спорт, маданий тадбирларга жалб қилиш билан чекланмасдан, уларнинг билим ва шижоатини жамият тараққиёти учун фойдали ишларга жалб қилиш ҳам жоиз.

Қизлар, айниқса ишсиз ёшлар ўртасида тарғибот-ташвиқот ишлари суст. Ҳудудда саноат, ишлаб чиқариш, ҳунармандчилик соҳаларига эътибор кам. Одамлар орасида боқимандаликка ружу қўйганлар кўп учрамоқда. Шу боис депутат ёшлар етакчиси, аёллар фаоли, маҳалла оқсоқоли, ҳоким ёрдамчиси, солиқ ва ижтимоий ҳимоя ходимларининг ҳар бири билан алоҳида мулоқотда бўлиб, уларга ўз тавсияларини берди.

O‘zLiDeP Қорақалпоғистон  Республикаси Кенгаши

матбуот хизмат