Аёл — жамият гултожи, меҳр ва муҳаббат тимсолидир. Дунёнинг ҳеч бир жойида ўзбек аёлидек тонг отгунча бедор бешик тебратадиган, фарзанди учун тандирда ширин кулчалар ёпадиган, боласининг кўзмунчоғини кўзига сурадиган меҳрибон, куюнчак она бўлмаса керак. Бинобарин, аёлни эъзозлаш, унга оила таянчи, миллат тарбиячиси сифатида эҳтиром кўрсатиш бугун давлат сиёсати даражасида қаралаётгани ҳам бежиз эмас.

8 март — Халқаро хотин-қизлар куни муносабати билан O'zLiDeP Сурхондарё вилояти Кенгаши томонидан ҳам вилоят Кенгашидаги депутат аёлларни ҳамда партия сафида хизмат қилаётган хотин-қизларга эҳтиром кўрсатилди.

Байрам муносабати билан ташкил этилган тадбирда даставвал, давлат раҳбари томонидан бу йил хотин-қизларимиз учун бериладиган қатор имтиёзлар оғриқ нуқтамизга айланиб улугрган муаммоларга ечим топгани ҳақида айтиб ўтилди. Хусусан, аёл тадбиркорлар сафи кундан кунга кенгайиб бораётган бир вақтда давлат раҳбари бу ҳаракатни янада жадаллаштириш ниятида 6 ой давомида тадбиркорлик фаолияти билан шуғулланган хотин-қизларга 300 миллион сўм, 2 йиллик фаолиятга эга хотин-қизларга эса 1 миллиардгача, 3 йиллик фаолиятга эга тадбиркор аёлларга 2 миллиардгача имтиёзли кредитлар ажратиш таклифини билдиргани таъкидланди. Айниқса, докторантурада ўқиш учун хотин-қизларга ҳар йили 300 тадан мақсадли квота, давлат бошқаруви академияда ўқиши учун эса 100 та квота ажратилиши илм ўрганишга аҳд қилган олима қизларимиз учун ҳам яна бир қулайлик бўлгани эътироф этилди.

Сўнг, тадбирга жам бўлган бир гуруҳ депутат хотин-қизлар ҳамда фаоллар байрам билан қутланиб, уларга эсдалик совғалари улашилди.

O'zLiDeP Сурхондарё вилояти Кенгаши

матбуот хизмати