Бундан йигирма йил олдин бир гуруҳ ташаббус­кор гуруҳ аъзоларининг Тадбиркорлар ва ишбилармонлар ҳаракати – Ўзбекистон Либерал-демок­ратик партиясини тузиш, бундай ҳаракатнинг сиёсий саҳнага чиқиб келишига қандай зарурият бор эди, деб мендан кўпинча ёшлар сўраб қолишади. Жуда ўринли савол. Тўғрими?

 Эслайлик, собиқ иттифоқ даврида узоқ йиллар давомида қотиб қолган сиёсий қарашлар мамлакатнинг иқтисодий йўлини белгилаб берарди. Етмиш йил давомида одамлар онгига сингдирилган – инсонга, жамиятга, ишга,  давлатга, айниқса хусусий мулкка бўлган қарашлар иқтисодиётда хўжасизлик, лоқайдлик каби иллатларни келтириб чиқарди. Ҳайбаракаллачилик, ишлаган ҳам, ишламаган ҳам бир хил маош олиши меҳнат унумдорлигига салбий таъсир қилди. Қишлоқ хўжалигида пахта яккаҳокимлиги ўрнатилди.

Шунингдек, мамлакатнинг сиёсий мустақиллигини кўп жиҳатдан унинг иқтисодий барқарорлигини белгилаб беришини унутмаслик керак. Гарчи, 2003 йиллари мустақилликка эришганимизга эндигина ўн йилдан ошган бўлса-да, собиқ тузум қолипига тушиб қолган иқтисодиётимизни, энг муҳими, одамлар онгида, тафаккурида меҳнатга, мулкка бўлган муносабатни кескин ўзгартириш талаб қилинарди.

Халқимизнинг қонида бор ишбилармонлик, тадбиркорлик хислатларини қайта уйғотиш, унутилаёзган ҳунармандлик, деҳқончилик ва бошқа соҳаларда асрлар давомида шаклланган анъаналарни жонлантириш давр талаби эди.

Буни яхши англаган халқимиз, кенг жамоатчилик, эндигина шаклланиб келаётган тадбиркорлар, фермер ва хусусий бизнес вакиллари айнан O‘zLiDeP тимсолида ўз манфаатларини ҳимоя қилишга қодир, уларни ҳар томонлама қўллаб-қувватлашга ҳаракат қиладиган сиёсий кучни кўришди.

Қувонарлиси, бу ишонч йилдан йилга мус­таҳкамланиб бормоқда. Бунинг асосий сабаби, депутатларимиз, партия фаолларининг аҳиллик билан мамлакатда кечаётган ҳар бир ижтимоий-сиёсий, иқтисодий жараёнларда фаол иштирок этаётганлигидадир. Лекин  катта-кичик ютуқларимиз хотиржамликка берилишимизга асос бўлмайди. Аксинча, янада кўпроқ ҳаракат қилишга, фидойилик кўрсатишга ундайди.

 Норқул НУШАРОВ,

Халқ депутатлари Жиззах вилоят

кенгаши депутати,

Фахрийлар кенгаши аъзоси