O‘zLiDeP Фарғона вилоят Кенгаши вилоят ҳокимлиги билан ҳамкорликда “Турон эко цемент” МЧЖда “Сен ҳам фаол ёшлар сафидасан!” лойиҳаси доирасида “Ёшлар бандлигини таъминлаш энг муҳим вазифамиз” шиори остида ёшлар Форумини ташкил этди.

Форумда O‘zLiDeP Сиёсий Кенгаши Ижроия қўмитаси масъул ходимлари, “Ёшлар қаноти” фаоллари, туман ҳокимлиги, маҳаллий вакиллик органларидаги партия депутатлик гуруҳи аъзолари, уюшмаган ёшлар ҳамда ОАВ вакиллари иштирок этди.

Тадбирда таъкидланганидек, O‘zLiDeP ёшларнинг эзгу интилишлари ва ташаббусларини, ижодий ва интеллектуал салоҳиятини рўёбга чиқаришга салмоқли ҳисса қўшмоқда. Бу борада олиб борилаётган ишлар партиянинг ёшларнинг тадбиркорликка оид билим ва кўникмаларини шакллантириш, уларнинг бизнес-режаларини амалга ошириш, касб-ҳунар коллеж битирувчилари бандлигини таъминлашга кўмаклашишдек дастурий мақсадларига ҳамоҳангдир.

Ушбу форум ҳам мазкур йўналишдаги ишларнинг мантиқий давоми бўлди. Чунки ушбу лойиҳа уюшмаган ёшлар муаммоларини аниқлаш ва ечим топиш, хорижда ноқонуний тарзда ишлаб юрган ёшларни қайтариш, уларни турли диний оқимларга қўшилиб кетишини олдини олиш, йигит-қизларни иш билан таъминлаш мақсадида ташкил этилди.

–Партиямиз Ҳаракатлар стратегияси ҳамда “Фаол тадбиркорлик, инновацион ғоялар ва технологияларни қўллаб-қувватлаш йили” Давлат дастурида белгиланган вазифаларни самарали амалга оширишга қаттиқ бел боғлаган, – дейди O‘zLiDeP Сиёсий Кенгаши Ижроия қўмитаси ёшлар билан ишлаш бўлими мудири Сардор Марипов. – Шу боис ёшларнинг ижтимоий-сиёсий фаоллигини ошириш, ҳуқуқий маданиятини юксалтириш, уюшмаган ёшлар бандлигини таъминлашга алоҳида эътибор қаратяпмиз. Бугунги форум доирасида ҳам ёшларнинг турмуш шароити, орзу интилишлари билан қизиқдик, муаммолари тингладик, Аксарият масалалар шу жойнинг ўзида ҳал этилди.

Таъкидлаш керак, форум доирасида бўш иш ўринлари ярмаркаси бўлиб ўтди. Партия “Ёшлар қаноти” ташаббуси билан ишсиз юрган 100 нафар йигит-қиз “Турон эко цемент” маъсулияти чекланган жамиятига ишга қабул қилинди.  

Форум якунида 30 нафар ёшга партиянинг аъзолик гувоҳномалари топширилди.

O‘zLiDeP Фарғона вилоят

Кенгаши матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!