O‘zLiDeP Каттақўрғон шаҳар Кенгаши томонидан тумандаги 2 -сонли мусиқа мактабида сайёр қабул ташкил этилди.

Тадбирда шаҳардаги мутасадди ташкилот вакиллари, Халқ депутатлари вилоят ва шаҳар Кенгашидаги партия депутатлик гуруҳлари аъзолари иштирок этди.

Учрашувда “Навбаҳор” маҳалласида яшовчи 70 ёшли Муқаддам ая  Муҳиддинованинг қилган мурожаати  кўпчиликнинг эътиборини ўзига тортди.

Онахон эгизак набиралари биринчи гуруҳ ногирони эканини айтиб, уларга ногиронлик аравачаси ажратишда амалий ёрдам сўраб мурожаат қилди. Шунингдек, “шаҳаргаз” таъминоти идорасидан иш ҳажми қисқарганлиги сабабли   ишидан айрилган ўғлини қайта ишга тиклашда кўмак сўради.

Унинг мурожаати жойида қаноатлантирилди. Халқ депутатлари Каттақўрғон шаҳар Кенгашидаги O‘zLiDeP депутатлик гуруҳи аъзоси Музаффар Ҳошимов ва Эркин Жўраевлар саъй-ҳаракати билан онахоннинг иккала набирасига ҳам ногиронлик аравачаси топширилди. Ўғли Фаҳриддин Муҳиддиновни иш билан таъминлаш бўйича қилган мурожаати эса шаҳар бандликка кўмаклашиш маркази томонидан ҳал этиладиган бўлди.

–Жорий йилнинг 6 ойи давомида O‘zLiDeP Каттақўрғон шаҳар Кенгаши томонидан 3 та сайёр қабуллар уюштирилди, – дейди партия шаҳар Кенгаши аппарат раҳбари Наби Артиқов. –Қабуллар давомида фуқаролардан 30га яқин мурожаатлар келиб тушди. Мазкур мурожаатларнинг 90 фоизи шу кунгача ҳал этилган бўлса, 10 фоизи  ўрганиляпти.  

Сайёр қабулда ичимлик суви ва сув исрофгарчилиги ҳамда коммунал тўловлардан нореал қарздорликлар бўйича келиб тушган мурожаатлар депутатлик назоратига олинди.

Бахтигул ҚАРШИЕВА,

O‘zLiDeP Самарқанд вилоят

Кенгаши матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!