O‘zLiDeP Қувасой шаҳар Кенгаши “А.Навоий” МФЙда сайёр қабул ташкил этди.

Аҳоли билан мулоқот тарзида ўтказилган учрашувда асосан, ишга жойлашиш, тадбиркорлик қилиш учун ер ажратиш, кредит маблағи олиш, электр энергияси, газ, ичимлик суви билан таъминлаш каби масалаларда мурожаатлар келиб тушди. 

“А.Навоий” маҳалла фуқаролар йиғинида яшовчи М.Маматқулов онаси оғир дардга чалинганини, касаллик бўйича жарроҳлик амалиёти ўтказилиши зарурлиги ва бунинг учун бепул дори-дармон кераклигини айтди. Ушбу масалада халқ депутатлари шаҳар Кенгашидаги O‘zLiDeP депутатлик гуруҳи аъзолари томонидан шаҳар тиббиёт бирлашмасига депутатлик сўрови юборилиши режалаштирилди.

Шу ҳудудда яшовчи М.Хайитохунов кўп йиллар давомида 2-автобазада ишлаган. Шу боис, унга 1995 йилда автобаза томонидан уй-жой берилган. Бироқ ҳужжатларни соҳталаштирган автобаза директори фуқарога тегишли уйдан уни чиқариб юборди.

Сайёр қабулда сўз олган М.Ҳайитохунов шу масалада мутасаддилардан кўмак сўради. Унинг мурожаати шу ернинг ўзида ўрганиб чиқилиб, тегишли ташкилотларга депутатлик сўрови юбориш орқали ҳал этиладиган бўлди.

–Тўғриси, ҳудудимизда ташкил этилган сайёр қабулдан маҳалламиз аҳли хурсанд, – дейди “М.Улуғбек” МФЙ раиси Боқижон Ҳолбоев. – Боиси, юзма-юз мулоқот давомида асосан ички йўлларни таъмирлаш, фуқароларни тоза ичимлик суви билан таъминлаш, тиббий хизмат сифатини ошириш, бандлик масалалари юзасидан аҳолининг мурожаатлари ўрганилди. Асосийси, ҳар бир мурожаат диққат билан тингланиб, аҳоли норозилигига сабаб бўлган муаммоларнинг аксарияти жойида ўз ечимини топди. 

Умуман, сайёр қабул давомида фуқаролардан тушган мурожаатларнинг аксарияти ҳал этилиб, муддат талаб этадиган мурожаатлар бўйича масъуллар бириктирилди.

 O‘zLiDeP Фарғона вилоят

Кенгаши матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!