Хорижий инвестициялар оқимини кўпайтириш, хизмат кўрсатиш сифатини юқори даражага етказиш, ялпи ички маҳсулот таркибида хизматлар улушини янада ошириш, халқаро брендларни иқтисодиётимизга жалб қилиш, иқтисодиётнинг эркинлиги ва рақобатбардошлиги ошириш борасида оқилона сиёсат юритилаётган бир вақтда, тайёр ишлаб турган тизимни йўқотишга уриниш одилона қарор эмас.

 

Қулай инвестицион муҳит яратиш учун қилинган жуда катта меҳнат натижасини, айнан шу “шаблон”даги бошқа корхонани очиш эвазига хавфга қўйиш ярамайди.

Тошкент шаҳрида меҳнат қилаётган 50 минг нафар “киракаш”лар “Яндекс такси” хизматидан фойдаланаётган бўлса, бу шу тизимнинг қулайлиги ва кўпчиликка мақбуллигидандир. Қолаверса, “Яндекс такси” хизматидан мамлакатимизга ташриф буюраётган туристлар ҳам кенг фойдаланмоқда.

 

Маълумот учун: “Яндекс такси” хизмати дунёнинг 20 га яқин давлатида фаолият юритади. Бу давлатлар ичида Ўзбекистон ҳам бор. Ушбу давлатлар “Яндекс такси” хизматига ишонч билдирмоқда ва фойдаланмоқда. 2018 – йилдан “Яндекс такси” хизмати ва “Uber” (63 та давлатнинг 700 дан ортиқ шаҳарларида фаолият кўрсатади) хизмати билан хамкорликни бошлаганини хисобга оладиган бўлсак, компания жаҳон миқёсида ўз ўрнини эгаллаган компания сифатида шакллангани кўриниб турибти.

 

Юқоридагилардан келиб чиққан ҳолда соҳада эркин рақобатни вужудга келтириш ва юқори даражада хизмат кўрсатадиган корхоналар сонини кўпайтириш, уларнинг ҳуқуқий манфаатларини ҳимоя қилишга ҳамда қонуний асосларини яратишга эътибор қаратсак мақсадга мувофиқ бўларди.

 

Ўзбекистон бозорига келган хорижий компаниялар маҳаллий хокимият органлари таклифи билан ёпилиб кетаверса, кейин бизнинг бозорларга ким келиб ишлайди, ким ишонади?

 

Бу каби ҳаракатлар давлатимиз имиджига номуносиб ва чет эл инвесторларининг ишочини йўқолишига олиб келади.