Азиз юртдошларим, турли миллат вакилларидан таркиб топган азиз сайловчиларим!

Бутун жаҳонда короновирус пандемияси билан боғлиқ вазият кундан-кун мураккаблашиб бораётганига барчамиз гувоҳ бўлиб турибмиз. Короновирус инфекцияси аниқланган илк кунлардан муҳтарам юртбошимиз раҳбарлигида халқимизни касалликдан сақлаш, иқтисодиётимизда юз бериши мумкин бўлган инқирозларнинг олдини олиш мақсадида барча зарур чоралар кўрилди.

Мен сайланган 40-Зарафшон сайлов округининг ҳудуди деярли вилоятимизнинг тенг ярмини қамраб олади. Бугун яна бир бор сизларга мурожаат қилмоқдаман. Карантин қоидалари, қатъий тартиб интизом – бу бизнинг, халқимизнинг, бешикдаги боламиз-у тўрда ўтирган ота-онамизнинг соғлиғини ўйлаб қилинаётган ва бугунги кунда жаҳон тажрибасида синалган бирдан бир тўғри йўлдир.

Қизилқум диёрининг қалби тоза, қадри баланд фарзандлари!
Ушбу синовли кунларда юксак инсоний фазилат билан, ҳақиқий ватанпарварлигимизни кўрсатиб, муҳтарам Президентимиз атрофида жипслашиб, кўп миллатли Ўзбекистон халқининг, сабр матонатини намоён қилиб, карантин қоидаларига қатъий риоя этсак бу синовли кунлардан ёруғ юз билан чиқиб кетамиз!

Қизилқум ҳудуди аҳоли тарқоқ жойлашган макон. Олис овул, қишлоқ, қўргон ва отарларда яшаётган юртдошларим вирус бизгача етиб келмайди деб эътиборсизликка йўл берманг. Зеро, оила аъзоларингиз ва яқинларингиз саломатлиги ўз қўлингизда. Ўзингизни асранг ва уйда қолинг!

Акшагул ТУЛЕГЕНОВА,

Олий Мажлис Қонунчилик

палатаси депутати,

O‘zLiDeP фракцияси аъзоси