Namangan viloyati mamlakatimizning iqtisodiy salohiyati yuqori, boy tarix va madaniyatga ega hududlaridan biri hisoblanadi. Respublikamizda barcha sohalarda amalga oshirilayotgan keng ko‘lamli islohotlar viloyat ijtimoiy-iqtisodiy hayoti, shahar va qishloqlarining kun sayin o‘zgarib, obod bo‘lib borayotgani, aholi turmush farovonligi yuksalayotganida ham o‘z aksini topmoqda.Bu haqda yurtboshimiz kuni-kecha viloyatga tashriflari chog‘ida ham alohida ta’kidlab o‘tdilar. 

Bundan salkam bir yil avval Prezidentimiz viloyatimizga bo‘lganlarida viloyatda bunyodkorlik ishlarini amalga oshirish, yangi korxonalar, sanoat va tadbirkorlik sub’ektlari tashkil etish, yangi ish o‘rinlari yaratish bo‘yicha zarur ko‘rsatmalar bergan edilar. O‘tgan davr mobaynida mazkur topshiriqlar izchil amalga oshirilishi natijasida viloyatimiz iqtisodiy salohiyati yanada yuksalib, mahsulot ishlab chiqarish va eksport hajmi oshdi.

Shu bois davlatimiz rahbari bu galgi tashrifi davomida mazkur topshiriqlar ijrosi bilan tanishib, yangi sanoat korxonalari va tadbirkorlik sub’ektlari tashkil etish, aholi, ayniqsa, yoshlar bandligini ta’minlash bo‘yicha taklif va tavsiyalar, ko‘rsatmalar berdi.

Prezidentimiz dastlab Chust tumanidagi “Baraka mevasanoat servis” mas’uliyati cheklangan jamiyati faoliyati bilan tanishdi.

Mazkur mas’uliyati cheklangan jamiyati 2015 yilda faoliyatini yong‘oq, mayiz va kovul eksportidan boshlagan. Jamiyat tasarrufidagi ekin maydonlarida g‘alla, kungaboqar, loviya, kartoshka, makkajo‘xori, issiqxonada pomidor parvarishlanmoqda. 17 sotixli uchastkada qishloq xo‘jaligi mahsulotlari tajribadan o‘tkazilyapti.

Shu yerning o‘zida davlatimiz rahbariga 2018-2019 yillarda baliqchilik, parrandachilik, chorvachilik, pillachilikni yo‘lga qo‘yish, tomorqachilikni yanada rivojlantirish, issiqxonada limon yetishtirish, tutzorlar tashkil etish, og‘ir hududlardagi maydonlarning suv ta’minotini yaxshilash, paxtadan bo‘shagan yerlarga turli ekinlar ekish va eksportbop mahsulotlar yetishtirish, viloyat eksport salohiyatini yanada oshirish bo‘yicha loyihalar taqdim etildi. Davlatimiz rahbari loyihani maqullab yong‘oqzorlarni ko‘paytirish, baliqchilik bo‘yicha mutaxassislar tayyorlash, kartoshka urug‘chiligini rivojlantirish bo‘yicha mutasaddilarga topshiriqlar berdi.

Shuningdek, Prezidentimiz Namangan shahridagi “Orzu” kichik sanoat zonasida amalga oshirilayotgan loyihalar bilan tanishdi. Salkam o‘n gektarni tashkil etadigan mazkur sanoat zonasida yengil sanoat, oziq-ovqat, tibbiy texnika, poligrafiya, polietilen paketlar va plyonkalar, energiya tejaydigan lampalar ishlab chiqarishga oid umumiy qiymati 142 milliard so‘mdan ziyod 22 loyihani amalga oshirish mo‘ljallangan. Loyihalar hayotga to‘liq tatbiq etilgach, yiliga 82,2 milliard so‘mlik mahsulot ishlab chiqariladi, 4 mingga yaqin kishining bandligi ta’minlanadi. E’tiborlisi, ishlab chiqarilayotgan mahsulotlarning asosiy qismi eksportga yo‘naltiriladi. 

Tashrif chog‘ida davlatimiz rahbari tadbirkorlarning muammolarini hal etish, xom ashyo yetkazib berish va mahsulotini sotishga ko‘maklashish bo‘yicha mutasaddilarga topshiriqlar berdi. Xorijiy texnologiyalarni olib kelish uchun mablag‘ ajratish, eksportni kengaytirish uchun korxonalarga xalqaro maqom berish zarurligini ta’kidladi. 

Bir so‘z bilan aytganda, Yurtboshimizning tashrifi davomida hech bir soha yoki yo‘nalish e’tibordan chetda qolmadi. Minglab xayrli amallarga, ezgu g‘oya va tashabbuslarga keng o‘rin bergan ikki kunlik tashrif davomida belgilangan vazifa va topshiriqlar biz deputatlar zimmasiga ham katta mas’uliyat yuklaydi. Demak, endi belgilangan topshiriqlar ijrosini ta’minlash uchun belni mahkam bog‘lab, yurtimiz rivoji uchun jiddiy ishga kirishish lozim.

Baxtiyor JO‘RAYEV,

Xalq deputatlari Namangan viloyat Kengashidagi

O‘zLiDeP  deputatlik guruhi a’zosi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!