Халқ депутатлари Шароф Рашидов туман Кенгашидаги O`zLiDeP депутатлик гуруҳи аъзоси Шарофат Нориевани нафақат туманда, балки вилоятда ҳам моҳир фермер, тадбиркор сифатида яхши билишади. Маслакдош депутатимиз, шунингдек, тумандаги “Олмачи” МФЙда ҳоким ёрдамчиси сифатида ҳам самарали фаолият олиб бормоқда.

O`zLiDeP Жиззах вилоят Кенгаши “Аёллар қаноти” гуруҳи ташаббуси билан “Гулчи опа торқа хизмати” кластерида маҳалладаги аёллар учун навбатдаги “Маҳорат дарси” ташкил этилди.

30 нафардан ортиқ ўз хонадонида гулчилик, чорвачилик билан шуғулланишни истаган хотин-қизлар, даставвал, бир қатор гул навлари, жумладан, карамгул ва хризиантема гулларини экиш, парвариш қилишдан тортиб, уруғлик олишгача бўлган жараёнлар билан таништирилди. Гулчилик билан узоқ йиллардан буён шуғулланиб келаётган Ш.Нориева тадбир иштирокчиларига ўз тажрибасидан келиб чиқиб, назарий ва амалий машғулотлар ўтказди.

Тадбиркор депутатнинг айтишича, гулчилик орқасидан бир сотих ердан  йилига ўртача  15-20 млн. cўмгача даромад олиш мумкин.

- Тўғрисини айтсам, мен хонадонимга чирой бериш учун гул экишни ўрганмоқчи эдим, - дейди тадбир иштирокчиларидан бири Моҳида Йўлдошева. – Бироқ, бугунги машғулотларда гулчиликдан уй шароитида ҳам мўмайгина даромад олиш мумкинлигини эшитиб, бунга жуда қизиқиб қолдим. Қолаверса, Гулчи опа янги иш бошлаётганларга уруғлик ва гул кўчатларини бепул  етказиб берар экан. Eтиштирган гулларимизни ҳам бозор нархида сотиб олар экан. Бу имкониятдан барчамиз албатта, фойдаланамиз.

Куннинг иккинчи ярмида барча иштирокчилар “Ишбилармон аёл” 2022 ҳудудий республика ғолиби Озода Эргашеванинг эчкичилик, паррадачилик, йилқичилик, қуёнчиилик борасидаги фаолияти билан танишишди.

Бу ерда ҳам иштирокчилар уй шароитида зотдор эчки боқиш бўйича маҳорат дарсларида иштирок этишди.

Саида Умаралиева,

O`zLiDeP Жиззах вилоят Кенгаши

“Аёллар қаноти” гуруҳи рахбари