O'zLiDeP Тошкент шаҳар Кенгаши томонидан мамлакатимиз мустақиллигининг 32 йиллигига бағишлаб “Янги ҳаёт учун, Янги Ўзбекистон учун!” шиори остида “Ишбилармон аёл - 2023” кўрик-танловининг Тошкент шаҳар босқичи ўтказилди.

Унда танловнинг туман босқичларида ғолиб бўлган тадбиркор, ҳунарманд хотин-қизлар иштирок этди. Кўрик-танловнинг Тошкент шаҳри ҳудудий республика босқичида ишлаб чиқариш, ҳунармандчилик соҳасида ўз фаолиятини олиб бораётган тадбиркор аёллар орасидан  ғолибларни аниқлаш мақсадида ҳакамлар ҳайъати аъзолари иштирокида тадбиркор хотин-қизларнинг кўргазмалари кўздан кечирилди.

Хотин-қизларни оилавий тадбиркорликка, кичик бизнес ва хусусий тадбиркорликка жалб этиш ҳамда бандлигига кўмаклашиш орқали ёш оилаларни қўллаб-қувватлаш, иқтидорларини рўёбга чиқариш, ташаббусларини қўллаб-қувватлаш мақсадида ташкил этилган кўрик-танлов юзлаб ишбилармон аёлларни кашф этиб келмоқда.  Бу йилги кўрик-танловда ҳам янги қиёфалар, янги ташаббускор, ҳунарманд ва тадбиркор аёлларимиз кўплигига амин бўлдик.

Бугунги кўрик-танловни Мустақиллик байрами арафасида ўтиши барчани қувонтирди. Тадбир давомида ҳамкор ташкилотлар масъулларидан таркиб топган ҳакамлар ҳайъати иштирокчиларнинг фаолиятига оид ролик, тегишли ҳужжатлар билан танишишди. Шундан сўнг, ҳар бир номзод ўзининг ишлаб чиқараётган маҳсулоти, унинг сифати, яратган иш ўрни ва сотуви, экспорт ҳажми ҳақида маълумот беришди. Ҳакамлар ҳайъати эса уларни белгиланган низом асосида одилона баҳолаб боришди.

Ҳакамлар ҳайъати хулосасига кўра, кўрик танловнинг ғолиблари аниқланди.

Биринчи ўринни Бектемир туманида  жойлашган 217 нафар иш ўрни яратган,  текстил махсулотларини ишлаб чикаришга мўлжалланган “Azalium” МЧЖ раҳбари Азиза Юсупова қўлга киритган бўлса, иккинчи ўринни Олмазор туманида жойлашган “MISS FEDISHA” бренди билан фаолият юритаётган тадбиркор Умида Нуриддинова, учинчи ўринни Мирзо Улуғбек туманида жойлашган, ҳар хил турдаги трикотаж махсулотларни, махсус кийимларни тикишга мўлжалланган, Тошкент шаҳрида ва Жиззах вилоятида ўзининг тадбиркорлигини йўлга қўйган “KAFTAN TEXTILE” МЧЖ раҳбари Санобар Танабаева эгаллади.

Ғолиб бўлганлар партия ва ҳамкор ташкилотларнинг диплом ва эсталик совғалари билан тақдирланишди.

Тадбирда кўзга кўринган санъаткорлари томонидан куйланган куй-қўшиқлар, бадиий чиқишлар тадбирни байрамона кайфиятда ўтишини таъминлади.