O‘zLiDeP Andijon tuman kengashi tomonidan Oyjamol mahallasi qoshida faoliyat yuritayotgan quyi tuzilmada 9 may – Xotira va qadrlash kuni munosabati bilan “Tinchlik yo‘lidagi fidoyiligingiz hamisha qalbimizda” mavzuida xotira tadbiri o‘tkazildi.

Unda quyi tuzilma a’zolari, deputatlar hamda Andijon tuman Axborot texnologiyalari kasb-hunar kolleji o‘quvchilari ishtirok etdi.

Dastlab tadbir qatnashchilari Andijon shahridagi  “Motamsaro Ona” haykali poyiga gulchambar qo‘yib, bugungi tinch, osuda hayotimiz uchun tamal toshini qo‘yganlar yurtdoshlarimizni xotirladilar.

Shundan so‘ng, ishtirokchilar Andijon tumanidagi Ikkinchi jahon urush qatnashchilarining xonadonlariga tashrif buyurib, ularga partiyaning esdalik sovg‘alarini taqdim qildilar.

–Bunday uchrashuvlar yoshlarimiz qalbidagi mustaqilligimizni asrab-avaylash, Ona Vatan erki, taraqqiyoti yo‘lida kuch-g‘ayratini ayamaslik tuyg‘ularini yanada mustahkamlaydi, – deydi quyi bo‘g‘in yetakchisi Muharram Sarimsoqova. – Bugun urush qatnashchilari ko‘pchilikni tashkil etmaydi. Omonlari holidan xabar olish, ularga yuksak insoniy hurmat-e’tibor namunalarini ko‘rsatish, qadrlash har birimizning burchimizga aylanmog‘i lozim.

Tadbirda Andijon tuman Axborot texnologiyalari kasb-hunar kolleji o‘quvchilarning urush lavhalarini aks ettirgan badiiy chiqishlari barchaning ko‘z o‘ngida o‘sha davrni jonlantirgandek bo‘ldi.

Odinaxon TURG‘UNOVA,

O‘zLiDeP Andijon tuman kengashi

 apparat rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!