– Qishlog‘imiz qabristoni daryoning nargi qirg‘og‘ida joylashgan, ammo ko‘prik yo‘q. Shu sababli ko‘p yillardan buyon jonaza bo‘lsa, turli muammolarga duch kelar edik, – deydi Oqdaryo tumani “Istiqlol”MFYda yashovchi T.Ismoilov. – Necha yillardan buyon hududdan kim deputatlikka saylanmoqchi bo‘lsa, saylovoldi dasturida “Agar deputat bo‘lsam, ko‘prik muammosini hal etaman”, derdi-yu saylangach, hammasi yodidan chiqib ketardi. O‘zLiDeP deputatlarining sayyor qabulidan so‘ng, masala 2019 yil dasturiga kiritilganini eshitib xursand bo‘ldik.

Ha, bugun bunday misollarni ko‘plab keltirish mumkin. Deputatlik so‘rovlari orqali erishgan natijalarimiz bilan maqtansak, arziydi. Jumladan, Payariq tumani “Qo‘lto‘lsin” MFY o‘tkazilgan sayyor qabuldan so‘ng, xududda O‘zbekiston telekanallarining ko‘rsatmasligi muammosi, Nurobod tuman, “Olg‘a” MFYda o‘tkazilgan sayyor qabulda qishloqqa olib keluvchi yo‘lni ta’mirlash masalasi, Kattaqo‘rg‘on tumanidagi Kattako‘rpa mahallasida o‘tkazilgan sayyor qabulda maktab xonalari yetishmasligi va yo‘l muammolari bo‘yicha chiqarilgan deputatlik so‘rovlari natijasida masalalar dasturga kiritildi va murojaatlar ijobiy hal etildi.

– Sayyor qabul davomida kelib tushgan murojaatlarning aksariyati joyida  ijobiy yechimini topgan, qolganlari esa Xalq deputatlari viloyat, tuman, shahar Kengashlari deputatlari tomonidan tegishli tashkilotlarga deputatlik so‘rovlari chiqarilgan, – deydi O‘zLiDeP Samarqand viloyat Kengashi Jismoniy va yuridik shaxslarning murojaatlari bilan ishlash bo‘limi mudiri Baxtiyor Mustofoyev. –Xalq deputatlari viloyat, tuman va shahar Kengashlaridagi partiya deputatlik guruhlari tomonidan turli idora va tashkilot rahbarlariga jami 514 ta deputatlik so‘rovlari yuborilgan. So‘rovlarning  500 tasidan ortig‘iga javob olingan , 7 ta so‘rovga javobsiz qolgan.

O‘zLiDeP  tomonidan joylarda sayyor qabullar tashkillashtirilib, fuqarolarning murojaatlarini o‘rganish  tizimining joriy etilganligiga bir yildan oshdi. Ushbu tadbirlar o‘zining ijobiy samaralarini bermoqda. Tahlillarga murojaat qiladigan bo‘lsak, joriy yilning 6 oyi davomida  O‘zLiDeP Samarqand viloyat, shahar, tuman Kengashlari tomonidan  joylarda 53 ta sayyor qabullar uyushtirilgan bo‘lib, ularda fuqarolardan 240 ta murojaatlar kelib tushgan. Murojaatlarning 32 tasi kichik biznes va xususiy tadbirkorlik sohasiga, 3 tasi fermerlik sohasi, 205 tasi ijtimoiy sohalarga oiddir.

Baxtigul QARShIYEVA,

O‘zLiDeP Samarqand viloyat

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!