O‘zLiDeP Sariosiyo tuman Kengashi tomonidan “Billur” mahallasida sayyor qabul tashkil etildi.

Sayyor qabulda hudud ahli tomonidan toza ichimlik suvi, yo‘llarni kapital ta’mirlash, elektr toki simlarini almashtirish, bankdan kredit olish, kutubxona tashkil etish, yoshlar bandligini ta’minlash va boshqa masalalar bo‘yicha 15 ga yaqin murojaat kelib tushdi.

Dastlab mahalla ahli nomidan so‘z olgan Murodullo Saidov hududdagi 60 ta xonadon toza ichimlik suvi bilan ta’minlanmaganini aytib, shu masalada mutasaddilardan ko‘mak so‘radi. Uning murojaatini Xalq deputatlari tuman Kengashidagi partiya deputatlik guruhi a’zosi Ibodulla Mirzayev o‘z zimmasiga olib, tuman hokimiga deputatlik so‘rovi yuborish orqali yaqin kunlarda muammoni hal etib berishga va’da berdi.

Shuningdek, bir guruh fuqarolar tomonidan mahalladagi simyog‘ochlarni yangilash va transformatorni almashtirish bo‘yicha kelib tushgan murojaat ham shu yerning o‘zida hal etildi.

Shu hududda yashovchi Zumrad Odinayeva va Ismat Hamrayevalar mahalla kutubxonasida kitob yetishmasligini aytib, shu masalada tashkilotchilardan amaliy yordam so‘radi. Bu masala ham e’tibordan chetda qolmadi, mahalla raisi Jo‘rabek Sattorov tashabbusi bilan “Har bir xonadonga bir kitob” loyihasini o‘tkazish orqali muammo hal etiladigan bo‘ldi.  

–Kutubxonamizda yoshlar foydalanishi uchun kitoblar to‘liq emasligi sababli, foydalanuvchilarni zarur kitob bilan ta’minlashda qiynalar edik, – deydi kutubxona rahbari Zumrad Odinayeva. – Mana shu masala bo‘yicha hududimizda tashkil etilgan sayyor qabulda murojaat qilgan edik, deputatlarimiz hamda mahalla raisi Jurabek Sattorov tashabbusi bilan kutubxonamizga 243 dan ortiq kitoblar yig‘ildi. Buning uchun tashkilotchilardan minnatdorman!

Yig‘ilishda bildirilgan boshqa murojatlar ham deputatlar nazoratiga olinib, yechimi bo‘yicha galdagi  vazifalar belgilab olindi.

Umidjon XUDOYKULOV,

O‘zLiDeP Sariosiyo tuman Kengashi

apparat rahbari

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!