Olmazor tumanidagi “Quyosh” mahalla fuqarolar yig‘ini binosi ko‘pdan beri ta’mirtalab holatda edi. Bu esa hududda yashovchi fuqarolar uchun biroz  noqulaylik tug‘dirardi.

Shu boisdan Prezidentimiz tomonidan ishlab chiqilgan “Obod mahalla” dasturi doirasida mazkur hududda ham keng ko‘lamli obodonlashtirish va ko‘kalamzorlashtirish ishlari olib borildi. Xususan, Xalq deputatlari Olmazor tuman Kengashidagi partiya deputatlik guruhi a’zosi, tadbirkor Marufjon Mirzahmedov sa’y-harakati bilan mahalla guzari yangidan bunyod etildi.

– Mazkur mahallada 8 mingga yaqin aholi istiqomat qiladi, – deydi partiya Olmazor tuman Kengashi apparat rahbari Jasur Kadirov. – Ayni chog‘da mahalla idorasi binosida otalar choyxonasi, militsiya tayanch punkti, sartaroshxona va tikuvchilik xonalari faoliyat yurityapti. Mahallada tadbirkorlik faoliyati bilan shug‘ullanish istagida bo‘lgan yoshlar va xotin-qizlar uchun maslahat markazi ham tashkil etilgan.

Ta’kidlash kerak, bugun aholining taklif-mulohazalarini inobatga olgan holda, xalq noibi M.Mirzahmedov tashabbusi bilan zamonaviy tipdagi maktabgacha ta’lim muassasasini qurish ishlari olib borilayotir. Maqsad bitta – aholining yashash sharoitini yaxshilash, yoshlarni har tomonlama barkamol qilib voyaga yetkazishdir.

Murodjon O‘RINOV,

O‘zLiDeP Toshkent shahar

Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!