O‘zLiDeP Самарқанд вилоят кенгаши томонидан тузилган Тадбиркорлик субъектларига солиқ мажбуриятларини бажариш юзасидан янада қулай шарт-шароитлар яратиш масалаларини жамоатчилик назорати тартибида кўриб чиқиш бўйича ишчи гуруҳи аъзолари Самарқанд шаҳрида қатор ўрганишлар ўтказди.

Депутатлар, партия фаоллари ҳамда ОАВ вакиллари дастлаб ўз фаолиятини бошлаш арафасида турган Радиология марказини бориб кўришди. Лойиҳа қиймати 300 миллиард сўм бўлган ушбу марказ радиология ва онкологияга ихтисослашган. Унинг ишга тушиши натижасида биринчи босқичда 60 нафар, кейинчалик қарийб 500 нафар фуқаронинг бандлиги таъминланиши белгиланган.

Германия, Австрия, Япония ва АҚШ каби ривожланган давлатларнинг энг сўнгги русумдаги замонавий технологиялари келтирилган тиббий муассасанинг фаолият бошлаши учун айрим қийинчиликлар юзага келмоқда экан. Ишчи гуруҳ аъзолари ҳудудда беморлар учун яратилаётган шароитлар ва келтирилган ускуналар билан яқиндан танишдилар. Тадбиркорнинг муаммолари атрофлича ўрганилди.

Янги тиббий ускуналарни импорт қилишда “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК томонидан ҳар бир ускунанинг рўйхатга олиш гувоҳномаси ва айнан тиббий буюмлар учун мавжуд бўлган сифат сертификати (CE certificate) мавжуд бўлиб, ушбу ҳужжатлар билан ускуналарни “Эркин муомала” божхона режимига (ИМ­40) ўтказиш имкони бор. Лекин тиббий фаолият учун лицензия олиш жараёнида ушбу ускуналарнинг мувофиқлик сертификати талаб этилади. Бунинг учун янги ўрнатилган ва ҳали ишлатилмаган ускуналарни яна ўша ДУКга мурожаат қилиб, қайта лабораториядан ўтказиш керак. Бу эса тиббий фаолиятни бошлашни янада қийинлаштиради.

Тиббий муассаса учун харид қилинган қурилиш материаллари, муолажа хоналари учун мўлжалланган махсус бўёқлар, девор қопламалари ҳамда жарроҳлик бўлимлари учун ишлаб чиқарилган тегишли компонентларнинг Европада ишлатиладиган сифат сертификати мавжуд бўлса­да, бизда яна қайтадан сертификатдан ўтказиш талаб қилинади. Натижада юзлаб иш ўринлари яратиб, қанчадан­қанча беморларга сифатли хизмат кўрсатадиган тиббий марказ ишга тушиши кечикмокда.   

Шунингдек, ишчи гуруҳи аъзолари “Шодиёна” савдо мажмуасида ҳам тадбиркорлар билан мулоқотда бўлиб, уларнинг ҳам таклиф­мулоҳазаларини эшитишди. Ушбу мажмуада етарлича шароитлар борлиги, аммо ер солиғи қиммат эканлиги, ҳудудга кириш қисмида дарвоза олдида светофор йўқлиги, машиналарнинг белгиланмаган жойда тўхтаётгани харидорлар учун ноқулайлик туғдираётгани айтиб ўтилди. Ўрганишлар давомида солиқ тўловларини тўлаш бўйича тадбиркорларга тушунтиришлар ҳам берилди.

Учрашувда солиқ тўловларини  амалга оширишда электрон дастур (мобил илова)дан фойдаланиш ҳолати, савдо комплексида солиқларни ҳисоблаш ва солиқ тўлаш билан боғлиқ муносабатларни амалга ошириш учун яратилган шарт­шароитлар муҳокама қилинди. “SAMARQAND APPAREL” хорижий корхонасида ишчи гуруҳи аъзолари иштирокида навбатдаги мулоқот ўтказилди. Маълумот ўрнида айтиш лозимки, тайёр тикув ва трикотаж маҳсулотлари ишлаб чиқарувчи ушбу корхона маҳсулотлари Германия ҳамда Жанубий Кореяга экспорт қилинмоқда. Замонавий ускуналар билан жиҳозланган корхонада 400 нафардан ортиқ ходим фаолият юритяпти.

Мулоқот давомида Халқ депутатлари вилоят кенгаши депутати, корхона раҳбари А. Аҳроров Солиқ кодексининг 320­моддаси (курсдаги фарқларга солиқ солишнинг ўзига хос хусусиятлари)га мувофиқ Низом жамғармасига хорижий валютада киритилган маблағлар бўйича валюта курсларининг ижобий фарқи даромад солиғи базасига киритилишини бекор қилиш ҳақида таклифни илгари сурди.

“INTRAMED” масъулияти чекланган жамиятининг асосий фаолияти аҳолига тиббий хизматлар кўрсатишдан иборат ва Соғлиқни сақлаш вазирлиги томонидан тақдим этилган лицензияга асосан фаолият юритиб келмоқда. Бугунги кунда жамият томонидан Самарқанд туманидаги Ўзбеккенти маҳалласи ҳудудида Президентимизнинг “2022­2026 йилларга мўлжалланган инвестиция дастурларини амалга ошириш чора­тадбирлари тўғрисида”ги қарори билан тасдиқланган ва манзилли дастурлар рўйхатига киритилган “Юқори технологик замонавий тиббиёт клиника марказини қуриш” лойиҳасини амалга ошириш ишлари давом эттирилмоқда. Лекин жамият солиқ имтиёзларидан фойдаланишда муаммоларга дуч келган. Аниқроғи, Солиқ қўмитаси жамиятнинг қонуний имтиёзлардан фойдаланишини рад этмоқда. Шу сабабли Савдо­саноат палатасининг Самарқанд вилоят ҳудудий бошқармаси томонидан “INTRAMED” МЧЖ манфаатини кўзлаб маъмурий судга солиқ қўмитасининг солиқ имтиёзларини қўлламасликда ифодаланган ҳаракатларини қонунга хилоф деб топишни сўраб даъво аризаси киритилган.

O‘zLiDeP Самарқанд вилоят кенгашида фуқаролар ҳуқуқлари ва қонуний манфаатларига дахлдор бошқа долзарб масалалар юзасидан ҳудудлар кесимида жамоатчилик назорати тадбирларини тизимли ташкил этишга бағиш лаб ўтказилган йиғилишда юқоридаги каби масалалар муҳокама марказида бўлди.   

Халқ депутатлари Самарқанд вилоят кенгашидаги O‘zLiDeP депутатлик гуруҳи раҳбари Бахтиёр Хўжаёров иқтисодиёт ривожида муҳим аҳамиятга эга бўлган тадбиркорлик соҳасидаги муаммо ва таклифларни бевосита ўрганиш, аниқланган муаммолар ечими бўйича курашиш натижадорликка эришишда муҳим аҳамият касб этишини алоҳида таъкидлади. Ишчи гуруҳ ўрганишлари жойларда давом этмоқда.

O‘zLiDeP Самарқанд вилоят кенгаши

 матбуот хизмати