Тадбиркорлар билан очиқ мулоқотда муаммолар ўртага ташланди

15.04.2022, 14:06

Пойтахтимизда Тадбиркорлар ва ишбилармонлар ҳаракати – Ўзбекистон Либерал-демократик партияси Тошкент шаҳар Кенгаши ва ЎзЛиДеП Чилонзор туман Кенгаши билан ҳамкорликда “Депутат ва тадбиркорлар” мулоқот форуми доирасида “Янги Ўзбекистон – иқтисодиёт драйвери бўлган тадбиркорларга берилаётган кенг имкониятлар мамлакати” мавзусида давра суҳбати ташкил этилди.

Мазкур тадбирни ўтказишдан мақсад тадбиркорликни жадал ривожланишини қўллаб-қувватлаш, маҳсулотларини экспорт-импорт қилишдаги фаолиятини янада яхшилаш бўйича уларга янгиликларни етказиш, тадбиркорларга тегишли ҳамкор ташкилотлар томонидан амалий ёрдам берилишини таъминлаш, тадбиркорлик фаолиятида учраб турган бир қатор муаммоларни доимий равишда тизимли ўрганиб бориш ҳамда уларни бартараф этишдан иборат.

Тадбирда тадбиркорларнинг дарди эшитилиб, уларни қийнаб турган муаммоли масалалар ечимини топишга доир ҳуқуқий маслаҳатлар берилди. Шу билан бирга, тадбиркорлар томонидан таклифлар ўртага ташланди.

Тадбиркорларнинг ҳуқуқий, иқтисодий, сиёсий билим ва кўникмаларини янада ошириш, тадбиркорлар томонидан яратилаётган инновацион лойиҳаларни амалга ошириш, уларнинг интеллектуал салоҳиятини юксалтириш, фаолияти сустлашиб қолган тадбиркорлик субъектлари экспорт салоҳиятини янада ошириш ва ҳозирги кунда тадбиркорлик фаолиятида дуч келинаётган муаммоли саволларга жавоб топиш ва уни ҳал этиш, экспорт соҳасида фаолият олиб бораётган тадбиркорларни қийнаётган масалалар, хорижий мамлакатларга ўзимизда ишлаб чиқарилаётган маҳсулотларни экспорт қилишда қонун доирасида ёрдам қилиш ва бошқа долзарб масалалар юзасидан фикр алмашилди.

– Тадбиркорлар томонидан чек берилмаганлиги учун қўлланиладиган жарималар миқдорини тадбиркорлик субъектларининг савдо айланмасидан келиб чиқиб белгиланса, мақсадга мувофиқ бўлар эди, – дейди тошкентлик тадбиркор Шерзод Ишназаров. – Катта супермаркетлар ҳамда кичик шохобчалар ҳам бир хилда 5 миллион сўм миқдорида жарима тўлаяпти. Амма буларнинг савдо айланмаси ҳар хил.

Мутасадди ташкилот вакиллари тадбиркорлар саволларига жавоб ва маслаҳатлар беришди. Баъзи тадбиркорларнинг муаммолари жойида ҳал этилди.

Шаҳноза Маматуропова, ЎзА