O'zLiDeP Нарпай тумани Кенгашининг «Аёллар қаноти» томонидан “Ишбилармон аёл” кўрик-танловининг туман босқичи ўтказилди.

Ушбу тадбирда тумандаги ишлаб чиқариш, миллий ҳунармандчилик, тикувчилик ва бошқа соҳаларда фаолият кўрсатиб келаётган илғор тадбиркор аёллар иштирок этишиб, ўзлари ишлаб чиқараётган маҳсулотлари намуналарини намойиш этдилар.

Жумладан, танловда иштирок этган тумандаги “Тоткент” маҳалла фуқаролар йиғинининг Араббой қишлоғида яшовчи тадбиркор аёл Обилова Азиза ўз фаолиятини 2005 йилдан буён бошлаган бўлиб, асосий йўналиши тикувчиликдан иборат. У миллий ва замонавий либослар, пардалар тикиш билан бир қаторда Тошкент шаҳридаги корхона билан тузилган шартномага асосан четга экспорт қилинадиган болалар кийим-кечаклари ҳам ишлаб чиқармоқда. Ҳозирда А.Обилова жами 12 хотин-қизни иш билан банд қилган. Ҳозиргача у 100 дан ортиқ шогирдлар етиштириб чиқарган. Тадбиркор аёл бугунги кунда қўшимча бино қуриб ўз фаолияти доирасини янада кенгайтиришни мақсад қилиб қўйган. Натижада, цехда 50 нафар хотин-қизни иш билан таъминлаш имконияти туғилади.

Худди шундай, “Зирабулоқ” маҳалласи яшовчи Эгамова Гулчеҳра ҳам ўз хонадонида тикувчилик ташкил этган бўлиб, унда 5 хотин-қиз доимий иш билан банд. Г.Эгамова буюртмалар асосида аҳоли учун миллий ва замонавий либослар, пардалар тикиш билан бир қаторда турли тўқувчилик ва безак маҳсулотларини ҳам тайёрлаб чиқармоқда.

Танлов натижасига кўра Обилова Азиза 1-ўринга лойиқ деб топилган бўлса, 2- ва 3-ўринларни ишбилармон аёллар Эгамова Гулчеҳра ҳамда Камолова Шаҳнозалар эгалладилар.

Танловда турли ғолибликни қўлга киритган хотин-қизларга туман Кенгашининг ташаккурномалари ва эсдалик совғалари топширилди. 

 Мархабо Чулиева,

O'zLiDeP Самарқанд вилоят Кенгаши

бўлим мудири