Дўстлик - Жиззах вилоятининг иқтисодий жиҳатдан анчагина ривожланган туманларидан бири ҳисобланади. Асосан, пахта-ғаллачилик, чорвачилик, боғдорчилик, енгил саноат ривожланган туманда айни пайтда 68 мингга яқин аҳоли истиқомат қилади. 410 та фермер хўжалиги фаолият олиб боради. Сўнгги йилларда туманда аҳолини, айниқса, хотин-қизларни тадбиркорликка кенг жалб қилиш борасида анчагина ишлар амалга оширилмоқда. Жумладан, бизнес субъектлари сони 854 тага етди. Туманда биргина “Ҳар бир оила тадбиркор” дастури доирасида 32 млрд. сўм кредит маблағлари ажратилган.

Мамлакат иқтисодиётида хотин-қизлар иштирокидаги хусусий секторнинг улуши ва аҳамиятини ошириш, тадбиркорлик ривожида аёлларнинг иштирокини янада кучайтиришни қўллаб-қувватлаш, жамиятда хотин-қизлар тадбиркорлигини сифат жиҳатдан ривожлантиришдаги илғор тажрибаларни оммалаштириш, хотин-қизлар ўртасида тадбиркорлик ва фермерлик фаолиятини янада ривожлантириш, улар раҳбарлик қилаётган тадбиркорлик субъектлари ва фермер хўжаликлари ўртасида хўжалик алоқаларини кенгайтиришга кўмаклашиш мақсадида ўтказилаётган O`zLiDePнинг “Ишбилармон аёл” кўрик-танловининг туман босқичида ҳам тумандаги тадбиркор аёллар фаоллиги яққол кўзга ташланди.

“SHOXJAXON” тадбирлар мажмуасида бўлиб ўтган кўрик-танловнинг туман босқичида турли хил йўналишларда фаолият олиб бораётган тадбиркор ва фермер аёллар билан бир қаторда якка ва оилавий тадбиркорлик билан машғул хотин-қизлар ҳам иштирок этишди. Айниқса, туманда  қуроқчилик ва тикувчилик йўналиши анча ривожлангани яққол кўзга ташланди.

35 нафар хотин-қизлар иштирок этган кўрик-танловда ҳакамлар ҳайъати хулосасига кўра,  30 та иш ўрни яратган якка тартибдаги тадбиркор Зуҳра Йигитова ғолиб деб топилди ва вилоят босқичига йўллланмани қўлга киритди.

“Манаслик чеварлар” МЧЖ раҳбари Матлуба Қаландарова иккинчи, “Бунёдкор тикувчи қизлари” МЧЖ раҳбари Гулҳаё Шоҳимардонова учинчи ўринни эгаллади. Шунингдек, яна 5 нафар иштирокчилар турли номинациядар бўйича ғолиб, деб эътироф этилдилар.

Ўзаро тажриба, фикр алмашиш майдонига айланган кўрик-танлов сўнгида ғолиб ва совриндорларга партия туман Кенгашининг эсталик совғалари ва дипломлари топширилди.

Саида Умаралиева,

O'zLiDeP Жиззах вилоят Кенгаши

“Аёллар қаноти” гуруҳи раҳбари