Мустақиллик байрами энг улуғ ва энг азиз байрамлардан биридир. Эркин, обод ва фаровон ҳаёт қуриш йўлидаги барча муваффақиятларимиз айнан истиқлол йилларида қўлга киритилган. Ватанимизнинг 31 йиллик мустақиллик байрами “Янги Ўзбекистонда эл азиз, инсон азиз” шиори остида вилоятимизнинг барча туман ва шаҳарларида кенг нишонланмоқда. Хусусан, O’zLiDeP Андижон туман Кенгаши томонидан “Қум кўча” МФЙ қошидаги партиянинг қуйи бўғинида ҳам байрам тадбири ташкил этилди.

Мазкур тадбирда O’zLiDeP Андижон вилоят кенгаши раиси Хуршидахон Халилова бошчилигидаги вилоят аппарат ходимлари, БПТ етакчилари, партия фаоллари, ёшлар, депутатлар ва узоқ йиллар турли соҳаларда самарали меҳнат қилган партия фахрийлари ҳам иштирок этишди.

Ушбу тадбирини Х.Халилова кириш сўзи билан очиб, Ватанимиз мустақиллигининг 31 йиллик байрами муносабати билан тадбир иштирокчиларини самимий қутлади. У ўз сўзида мамлакатимизнинг кўп асрлик тарихида мутлақо янги саҳифа очган, эл-юртимизни мустабид тузум кишанларидан озод қилиб, эркин ва фаровон ҳаёт қуриш йўлини очиб берган санага, Ўзбекистон давлат мустақиллигига 31 йил тўлганини алоҳида эътироф этди.

Шунингдек, бугунги кунда O’zLiDePнинг дастурий мақсад ва вазифаларини кенг жамоатчиликка етказишдаги фаол иштироки учун БПТ етакчилари ва партия фаолларига, иқтидорли ўқувчи ёшларга ташаккурномалари ҳамда эсдалик совғалари топширилди.

Байрам тадбири туман маданият бўлимининг санъаткорлари ва “Умид” иннавацион ўқув маркази ёшлари томонидан тайёрланган куй-қўшиқлар билан давом этди.