O’zLiDeP Хоразм вилоят Кенгаши ва Ўзбекистон Тадбиркорлик ва фермерликни қўллаб-қувватлаш маркази билан ҳамкорликда “Энг яхши бизнес режа” танловининг вилоят босқичи ташкил этилди.

Ҳозирда партия аьзолигига қабул қилинган бевосита тадбиркорлик ва фермерлик фаолияти билан шуғулланиб келаётган хотин-қизларнинг манфаатларини ҳимоя қилиш, тадбиркорлик фаолиятини кенгайтириш, касаначиликни ривожлантириш йўлида партия қатор ҳамкор ташкилотлар билан яқиндан ҳамкорлик қилиб келмоқда.

Бу борадаги ишларни O’zLiDePнинг биргина Хоразм вилоят Кенгаши мисолида таҳлил қиладиган бўлсак, 2023 йилда ҳамкор ташкилотлар иштирокида вилоят ҳудудида 400 дан ортиқ ўқув семинарлари, учрашув ва давра суҳбатлари ҳамда оммавий ҳайрия тадбирлари ташкил этилиб, уларда 18 690 нафар хотин-қизлар иштирок этишган бўлса, ушбу ўтказилган тадбирлар айни пайтда ўзининг ижобий самараларини бераётганини алоҳида таькидлаш жоиз.

Танловдан кўзланган асосий мақсад тадбиркорлик фаолиятини бошламоқчи бўлган хотин-қизларга ўз ишларини йўлга қўйишда ҳам назарий ҳам амалий жиҳатдан яқиндан кўмаклашиш, янги иш ўринлари яратиш, уларга бизнес режалар тузиш ҳамда ўз бизнесини йўлга қўйиш учун имтиёз ва переференциялар асосида кредит олиш билан боғлиқ масалаларда амалий ёрдам кўрсатишдан иборат.

Танлов давомида Хоразм вилоятида кичик бизнес, тадбиркорлик ва сервис соҳасини ривожлантиришда фаол хотин-қизларнинг бизнес лойиҳалари тақдимоти бўлиб ўтди.

Тақдимот якунида ҳакамлар ҳайъати томонидан энг фаол, энг яхши бизнес лойиҳалар саралаб олиниб, танлов ғолиб ва совриндорлари тақдирландилар.

Кўрик-танлов якуний хулосасига кўра 1-ўринни Урганч шаҳридан Зайнаб Собирова  қўлга киритган бўлса, 2-ўринни Ҳазорасп туманидан Зайнура Кенжаева ҳамда 3-ўринни Урганч шаҳридан Айша Шукуроваларга насиб этди.

Тадбир якунида барча иштирокчиларга вилоят Кенгашининг дипломи ва эсдалик совғалари топширилди.